Timmisartorsuit miffigisinnaasaat marluk naammaqaat
Siunnersuut tusarniaassutigineqarmat, mittarfiit 1200 meterit piumanerugitik, Air Greenlandip pisortaa Michael Binzer oqarpoq, imalu tunngavilersuivoq:
- Kalaallit Nunaata inuttussusia tunngavigalugu timmisartorsuit miffigisinnaasaat pioreersut marluk naammattutut isigaavut (Narsarsuarmi Kangerlussuarmilu, aaqq.). Nunamilu maani sisamanik mittarfissuaqartariaqanngilaq. Taama naliliinitsinnut tunngavigaarput isumannaannerpaamik miffigineqarsinnaassuseq. Kangerlussuup silaa allanngujaannerpaanini pillugu isumannaannerpaavoq, Michael Binzer oqarpoq.
Nuup Ilulissallu mittarfii 1799-meterinut tallineqaraluarpata sinerissap sinneranut angallannermut aamma kingunerlussinnaassasoraa.
- Angallanneq annikilliassaaq maannalu timmisartuussiffigisartakkavut minnerit akuttunerujussuarmik ornittalissavagut, nassuiaavoq.
Timmisartuussinerup akilersinnaassusia apeqqutaalluinnalissaaq.
- Air Greenlandimit Nuup Ilulissallu mittarfiisa 1200 meteriinnarnut tallinissaat inassutigerusussavarput, Atlantikoq qulaallugu timmisartorsuit missinnaanngikkarluartut, taamaalilluta timmisartut ullumikkut atukkatsinnit annerulaartut isorartunermut akilersinnaanerusumillu timmisartuussisinnaasut, pingaartumik aamma mingutsitsinnginnerusut atorsinnaalissagaluaratsigit, Michael Binzer naggasiivoq.
Michael Binzerip aamma ujartorpaa politikerit piffissamut, ikinnerpaamik ukiunik qulinik ungasinnerusumut, angallannikkut pilersaarusiornissaat. Pilersaarusiaq taanna allanngortinneqarsinnaassanngilaq. Allanngortinneqarsinnaannginnissaa pingaaruteqarpoq, tassami Air Greenlandip timmisartunik taarsersuilluni nutaanik pisiniarnissani pilersaarutigilereermagu.
