Nunatta assammik arsartartui nuannarineqaqisut massakkorpiaq Islandimi Keflavikimi saperngupput. Aamma tassani saperngupput Siriusimi qimussertunngorniarlutik Kangerlussuarmut sungiusariartut, angutit arfineq-marluk.
Kangerlussuarmi nunatsinni naalakkersuisunut ilaasortat tallimat aallarsinnaanatik uninngapputtaaq, taakkua Danmarkiliarput, namminersorneq pillugu ataatsimiititaliarsuup ataatsimiinnissaani peqataajartorlutik. Aamma meerarpassuit inersimasullu assammik arsartartut mittarfimmi utaqqigaluarsinnarlugit, nikallorlutik angerlaannartariaqarsimapput.
Tamatumunnga patsisaavoq timmisartorsuup Danmarkimeersup Kangerlussuarmut ullumi missinnaannginnera.
- Timmisartorsuarput Danmarkimiit ullumi Kangerlussualiaraluartoq Kangerlussuarmi nittaappallaarnera aamma mittarfimmi aputaajaanerup ajornartorsiornarnera patsisigalugu Islandimi Keflavikimut ingerlatiinnartariaqarparput, Jørgen Erik Andersen Air Greenlandimi angalatitsinermut pisortaasoq oqarpoq.
- Ilaasut Islandimi unnuissapput aqagulu ullaap tungaani qulingiluat qaangerneranni Kangerlussuarmut apuunnissaat naatsorsuutigaarput. Taava timmisartorsuaq nalunaaquttap akunnerata aappaata missaa uninngareerpat ilaasussat ullumikkut Danmarkiliartussaagaluit Danmarkiliaatissavavut, Jørgen Erik Andersen naggasiivoq.
Ilaasussat 300-t missaanniittut ullumi timmisartorsuup tikinngitsoorneranit eqqorneqartut oqaatigineqarpoq.