Timmisartoq sakkutuut sungiusartarfiannut nakkarsimavoq

Timmisartoq Boing 737 First Airimit pigineqartoq qattunernut Qaasuitsumiit kilomertererpaalunnguit ungasitsigisunut arfininngormat ualikkut nakkarpoq. Issimasut katillugit 15-it timmisartumiipput, taakkunanngalu aqqaneq-marluk ajunaarput, kisiannili niviarsiaraq ataaseq inersimasullu marluk annattuusut Eqalunni napparsimavimmut unitsinneqarlutik.

Sakkutuut sungiusarnerat Nanook Qaasuitsumi sakkutuunit 700-nit peqataaffigineqartoq sapaatip-akunnerani uani ingerlanneqarpoq. Taakku qulimiguulinnik annaassiniarnermullu atortunik allanik piareersimatitaqarnermikkut, timmissartumiit ikuallattumit inuit annassimasut pingasut annissinnaasimavaat.

Timmisartup nakkarnerani inuit aqqaneq-marluk ajunaarnerat Nunavummi aliasuutigineqaqaaq, taamaattorli inuit pingasut annannerat aamma qujamasuutigineqaqaluni. Eva Ariak, Nunavummi Naalakkersuisut siulittaasut CBC Newsimut oqarpoq, Nunavummiut tamarmik ilaqutariissuusut, ajunaarnermilu tamarluinnarmik attortissimaqisut.

Kisianni Eva Ariaap ingerlaannaq oqaatigaa, illoqarfinni nunaqarfinnilu annaassiniartartussanik atortunillu annertuumik pisariaqartitsisoqartoq, tassa allatigut ajutoortoqassagaluarpat piffissarujussuaq aatsaat atorlugu ikiorserneqarnissaq Canadap kujasissortaaniit ikiuiniartussat aggersaqqaarlugit pisussaammat.

Sakkutuut 700-t annaassiniartarnermik sungiusarlutik ajutoorfiup eqqaaniissimammata iluatsitsinerinnaavoq. Tassalu taakku ilaat minutsialunnguit atorlugit timmisartumut ikuallattumut tikiussinnaasimapput taamaalillutillu inuit pingasut ikuallagussaasussaagaluartut annaallugit.

- Annaassiniarnerup taassuma takutippaa illoqarfiit nunaqarfiillu eqqaanni annaassiniartartunik annaaasiniarnermullu atortunik qanoq pisariaqartitsisoqartiginera. Aammattaaq neriuutigineqarpoq tamanna Canadami generalguvernørimut Canadamilu ministeriunermut sakkutuut sungiusarnerat takusarlugu maanna Qaasuitsumiittunut annaassiniartartunik pisariaqartitsisoqarnera paasiumaaraat. Maanna taakku takusinnaalerpaat issittumi annaassiniartartunik peqarnissaa qanoq pisariaqartigisoq, Eva Ariak oqarpoq, nangillunilu, ajutoortoqarnerani annaassiniartussat Canadap kujasissortaanit aggersarneqartassappata piffissarujussuaq atorneqartussaasoq.

First Air Nunavimmi Makivik Inuit Organizationimit pigineqarpoq.