Timmisartoq nakkarpoq
Timmisartuaraq Cessna 310 Keflavikip kitaatungaaniit kilomerinik 90-it missaannik ungasitsigisumi nakkarpoq.
Danskit sakkutuuisa timmisartuat Challenger Kalaallit Nunaanni piffissami kingullermi alapernaarsuisoq, ujaasinermi peqataavoq. Timmisartoq alapernaarsuut taanna Kalaallit Nunaata Islandillu akornanni aalisariutinik alapernaarsuitillugu timmisartup nakkarneranik nalunaarut ippassaq tutsiuppoq
Qulimiguulik Lynx, alapernaarsuutip VÆDDEREN-ip qulimiguuliutaa, inuttani taarseriartorlugit maanna Reykjavikimiittoq, ippassaq aamma ujaaseqataavoq.
Mallit meterit pingasut missaanni portussuseqartarmata, isikkivilussisaqattaarmallu, ujaasineq ajornakusoortinneqarpoq. Timmisartuaraq ataasiinnarmik inuttaqartoq, motoorimi aappaanik ajornartorsiuteqareerluni nakkarpoq. Maannali annertunerusumik ilisimasaqanngikkallarpugut.
