Timmisartoq mittarfimmit nakkarnissamut 50 meterinik ungasitsigisumi unittoq

Nuummi mittarfimmi maajip naanerani ilungersunartumik pisoqarpoq.

Timmisartoq Dash 8 ilaasunik nassatanillu useqarluni Kangerlussualiartussaagaluartoq qangattanngiinnartariaqarsimavoq, timmisartortartullu timmisartoq mittarfiup naanissaanut 50 meterinik ungasitsigisumiilluni aatsaat unippaa. Nittartakkatigut nutaarsiassiisartoq, Ingeniøren ajutoornerit pillugit ataatsimiititaliap nalunaarusiaa tunngavigalugu allappoq.

Dash 8-p qangattarniarnerani timmisartoq 80 knopimik– tassa akunnermut 150 kilometerinit missaannik sukkassuseqarpoq. Timmisartortartup timmisartoq qangattartissinnaanngeriaramiuk qangattarniarluni 88 knobimut sukkatsippaa.

Timmisartulli qangattarniarnera iluatsinngimmat timmisartortartoq uneriarujussuarpoq – mittarfiullu naanissaanut 50 meterinik ungasitsigisumi unilluni.

Ajutoornerit pillugit ataatsimiititaliap oqarnera naapertorlugu timmisartoq oqimaappallaarsimavoq.

Timmisartoq nassatarpassuaqartoq

Air Greenland timmisartuussinermi nassatarpassuaqartarpoq. Taamaammat timmisartup initaa arfineq marluinnarnik tulleriiaanik issiavittaqartarpoq, ilaasullu 28-t issiavissaminnik nammineq toqqaasarlutik.

Timmisartortartut aallartinnginnerminni pisarnertut timmisartup oqimaassusaa kiisalu oqimaassutsit agguataarnerat timmisartullu orsussaa naatsorsoqqaarpaat.

Ajutoornerit pillugit ataatsimiititaliap ilaasimasut 28-t oqimaassusaannik, nassataasa tigummiaannarneqarsinnaasut qanoq oqimaatsiginerannik kiisalu timmisartup suani issianerannik apeqquteqarfigai.

Oqimaassutsimi naatsorsuinerni nalinginnaasuni angutit nassataallu tigummiarneqarsinnaasut 88 kiilumik oqimaassuseqassangatinneqartarput, arnat 70 kiilu meeqqallu 34 kiilu.

Uanilu ilaasut timmisartortartullu ataatsimut 2600 kiiluunissaat timmisartumi agguataarlugit qarasaasiamit naatsorsorneqarput.

Ingeniørenillu allaaserisaani kisitsisit naapertorlugit ataatsimut oqimaassuseq 300 kiilumik qaangiisimavoq. Timmisartortartullu oqimaassutsimik ”nalinginnaasumik” qaangiisimasut ilagaat, timmisartumilu ilaasut oqimaannerusut uani nalaatsornerinnarmi timmisartup siuata tungaanut issaasimapput.

Pisoq ilungersunartuusoq

Taamaalilluni timmisartup nutsuinera timmisartortartut kisitsineranut sanilliullugu 6 centimerit missaannik siuaamineroqqalluni. Taamaammat timmisartoq qangattarnissaminut saavata tungaa oqimaappallaarsimasoq, Ingeniøren allappoq.

Ajutoornerit pillugit ataatsimiititaliap pisoq ilungersunartuunerarpaa.

- Timmisartumi ilaasut nalinginnaasumit oqimaannerusut takutinneqarpoq, taakkulu timmisartumi issiavinni inississimanerat nalaatsortuuvoq, taamaammat tamanna timmisartup oqimaassusaanut naligiissaarneranullu sunniuteqarluni. Tamanna qulaajarparput, ajutoornerit pillugit misissuisartoq, Anders Kristensen oqarpoq.

Pisoq nalinginnaanngitsoq pissutigalugu Ajutoornerit pillugit ataatsimiititaliap timmisartortarnermut oqartussanut EASA-mut 2008-imi nalunaarusiaq tikkuarpaat, tassami tassanili oqimaappallaartut amerliartuinnarnerat pissutigalugu ilaasartut nalinginnaasumik oqimaassusaasa qaffanneqarnissaannut pissutissaqartoq aalajangerneqareernikuuvoq. Suliarli kingorna kinguneqarnikuunngitsoq, Ingeniøren allappoq.