Timigissartarfiit nukittuneqqusaattut
Nuummi timigissartarfiit maanna pingasuulerput. Tassaapput namminersortunit pigineqartut Fit & Fun aamma Nuuk Fitness, taakkulu pingajorilerpaat Nuummi Illorsuaq Timersortarfik aningaasaateqarfimmit inuussutissarsiornermik ingerlatsisumit pigineqartoq.
- Ernummatigaara timigissartarfiit pingasut Nuummi amerlavallaartut, Fit & Fun-imik piginnittoq Allan Juhl KNR-imut oqarpoq.
Nuuk Fitness-imik piginnittoq Karsten Sørensen aamma ernumavoq Nuummi Illorsuaq Timersortarfik timigissartarfimmik ingerlatsilermat.
- Isumaqarpugut tamanna naligiinngitsumik unammillernerusoq. Tamatumunnga tunngavilersuutigaarput Nuummi Illorsuaq Timersortarfik pisortat aningaasaataannik isertitaqartarmat. Qularinngilara timersortarfimmi timigissartarfik ingerlaannarsinnaasoq atuisut marluinnaagaluarpataluunniit uagulli namminersortutut taama pisoqassappat attassinnaanngilarput, Karsten Sørensen KNR-imut oqarpoq.
Nuuk Fitness-ip aamma Fit & Fun Sulisitsisut peqatigiiffiat GA suliakkissimavaat misissoqullugu Nummi Illorsuup Timersortarfiup taamatut unammillernera inatsisit tunngavigalugit illersorneqarsinnaanersoq. Taakku ernumanerminnut tunngavilersuutigaat pisortat aningaasaataat timersortarfimmut akiliutigineqartarmata.
- Kisianni inatsisitigut tamanna aporfissaqanngilaq, GA-mi allaffimmi pisortaq Karsten Klausen KNR-imut oqarpoq.
- Nuummi Illorsuaq Timersortarfik aningaasaateqarfimmit inuussutissarsiornermik ingerlatsisumit pigineqarpoq. Pisortanit tapiiffigineqartartut tassaapput timersoqatigiiffiit timersortarfiup attartorneranut tapiiffigineqartaramik, tamanna timersortarfimmut tapiissutitut taaneqarsinnaanngilaq inatsisit tunngavigissagaanni, GA-miit naqissusiipput.
Nuummi Illorsuarmi Timersortarfimmi aamma isumaqarput timigissartarfiit pioreersut toqqaannartumik unammillernagit.
- Isumaqarpugut timigissartarfinnut pioreersunut tapertaannaalluta. Isumaqarpunga timigissartarfiit pingasut maani illoqarfimmi ingerlasinnaalluartut, Nuummi Illorsuarmi Timersortarfimmi Inussivimmilu pisortaq Jens Kristian Berthelsen KNR-imut oqarpoq.
- Uagut pingaarnertut atuisartoraavut timersoqatigiiffiit taakkulu sungiusarfissaat killilerujussuupput. Taamaammat assammik arsartatut isikkamillu arsaattartut timigissartarfik sungiusarnerminnut tapertatut atortarpaat. Aamma uagut timigissartarfipput ajoqusersimasut sungiusaqqittarfiattut atorpoq, Jens Kristian Berthelsen oqarpoq.
Nuuk Fitness aamma Fit & Fun siunissaq pillugu pissangapput. Taakku marluullutik nalunaarput unammillerneq suli malugisinnaanagu. Maluginiarpaalli timersortarfimmi akeqanngitsumik misiliinissaq neqeroorutaasut atuisut amerlisarniarlugit.
- Assut pissangavunga ukiup naanerani naatsorsuutit takunissaannut. Tassani aatsaat iluamik takusinnaalissavarput timersortarfimmi timigissartarfeqalernera isertitanik annaassaqaatigineripput, Allan Juhl oqarpoq.
