Timersullammak toqqarneqarpoq

Kalaallit Nunaanni Timersortartut Kattuffiat nalunaarpoq ukioq manna "timersullammak"-mik toqqaaniarneq ajornakusoorsimanngitsoq, tassa Sermitsiaq peqatigalugu Silkeborgimi assammik arsartartoq, Angutimmarik Kreutzmann, toqqaramikku.
Allattoq Mads Lynge
decembarip 19-at 2007 13:40

”Ukioq manna timersullammak” inuusukkaluaqaluni timersuutini pikoriffigalugu takutissimavaa. Sungiusalernermi siulliusarpoq, peqqissumillu eqqissisimanartumik inooriaaseqarluni, taamaalilluni inuusuttunut allanut maligassiuilluni, timersullammattut toqqarneqarneranut peqqutaasut ilaattut taama allassimavoq.

Kalaallit nunanut allanut unammisartuisa silarsuarmi 2006-imi pissartanngorniunnissanut Brasiliami anngunniunnermi Angutimmarik Kreutzmann pingaaruteqarsimaqaaq.

Angutimmarik 10.000 koruuninik qiimmassaaserneqarpoq.

74-inik ukiulik Qasigiannguaneersoq, Amalie F. Petersen, utoqqaat peqatigiiffiannik ukiut kingulliit tallimat sullissilluarsimanera pillugu Timersortartut Kattuffiata aamma qiimmassaaserpaat.

Ilulissani najugaqartoq, Helga Nielsen, Inuit Gamesini sungiusaasutut sulilluarnera pillugu aamma qiimmassaaserneqarpoq. Helga Nielsen Inuit Gamesilli aallartimmata ingerlatsisutut aaqqissueqataasarsimavoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq