Timersortartut periarfissagissaarnerulerput
OL-imut peqataasinnaanissamut piumasaqaatit annikillisarneqaqqammerput, nunattalu timersortartuinut tamanna sunniuteqassasoq, Kalaallit Nunaanni Timersoqatigiit Kattuffianni siulittaasup Nuka Kleemannip oqaatigaa.
Danmarkimi timersoqatigiit kattuffiat Kalaallit Nunaannilu Timersoqatigiit Kattuffiat arfininngornermi ataatsimiinneranni tamanna anguneqarpoq, Nuka Kleemanilu tamanna nuannaarutigeqaa:
- Nunatsinniit oqartuartarsimavugut OL-imut peqataasinnaanissamut qallunaat nunaanninnganniit piumasaqaatit annertuallaartut, maannakkullu timersortartutsinnut ajornannginnerulissaaq, neriuppungalu periarfissaq tamanna atorluarumaaraat, Nuka Kleemann oqarpoq, nangillunilu:
- Ataatsimeersuarneq naammassimmat oqiliallattutut misigisimavugut, ajugaasimaarnanngitsoornanngilaq anguniagaq taamatut angusinnaanngorsimagatsigu.
Piumasaqaatit annikillisarneqarneratigut sisorartartut taekwondortartullu OL-imut peqataasalersinnaanissaminnut periarfissagissaarnerulersut ilimagineqarpoq.
