Timersortartut ikiaroornartulerisarnerat pakatsissutigineqaqaaq
Qanittukkut timersortartut marluk ikiaroornartutorsimanerannut tunngasumik suliaq tusarliunneqaqqammerpoq.
Allalu aamma angut 25-nik ukiulik Qeqertarsuarmeersoq qanittukkut oktobarip 16-iani Danmarkimut timersoriareerluni Aasiannut aqqusaartilluni ikiaroornartumik 90 gramimik iioraasimasoq tigusarineqarpoq.
Timersortartut akornanni ikiaroornartulerisoqartarnera Timersoqatigiit Kattuffiata siulittaasuata Nuka Kleemannip, utoqqatsinartutut, akuerineqarsinnaanngitsutut pakatsinartutullu nalilerpaa:
-Siullermik una oqaatigissavara assut utoqqatsinarpoq, aamma Timersoqatigiit Kattuffianniit akuerisinnaanngilluinnarparput timersorneq aqqutigalugu angalallutik taamatut iliortarsimassappat. Siulersiusoqatikka timersortartoqartikkalu sinnerlugit assut pakatsivugut taamaattoqarsimassappat, - aatsaammi pisimasoq taanna tusaraluarlugu taamatut nalilersinnaavara, Nuka Kleemann oqarpoq.
Aperaarput Kattuffiup tungaaniit timersortartut akornanni ikiaroornartulerisarneq pinaveersimatinniarlugu qanoq iliorsinnaanersut, ima akivoq:
- Soorunami uagut eqqartuussisinnaanngilagut, kisiannili politiit allallu tamakku suliassat suliarissavaat. Dopingimut tunngatillugu uagut nammineerluta ataatsimiititaliaqarpugut, taakkualu sinaakkutissaat uagut aamma suliarisarlutigit, kisianni taamatut timersorunnaartitsigallarnerit ataatsimititialiap isumagisarpaat. Taamaattumik taamaattoqartarnera uaguulluni assut kipiluttunarpoq, Timersoqatigiit Kattuffiata siulittaasua Nuka Kleemann oqarpoq.
Angut 25-nik ukiulik ikiaroornartumik 90 gramimik aqajarormiulik tigusarineqarami Aasianni politeeqarfimmukaanneqartilluni politeeqarfiup silataaniit qimaasimavoq, qimaaffigisimavaalu meeqqat atuarfiat, politiillu atuarfimmukartariaqarsimapput, 25-nillu ukiulik pinaaseqisoq pagginnikkut aatsaat tigusarineqarsimasoq. Angutip ikiaroornartumik eqqusseriaraluarnera inatsisit tunngaviusut malillugit eqqartuussivimmi suliassanngortinneqassasoq, Aasianni politeeqarfiup pisortaa Gert Jakobsen radioaviisimut oqaluttuarpoq.
