Timersortartut akikillisaavigineqarput

Timersortartut unammiartortut umiarsuarmut ilaasartaammut ilaanialeraangamik akikillisaaffigineqaqqittalissapput. Kalaallit Nunaanni Timersoqatigiit Kattuffiat Arctic Umiaq Line-imut isumaqatigiissusioreersorlu tamanna nalunaarutigineqarpoq.
Allattoq Hagen Højer Christensen, Knud Reimer
februaarip 24-at 2012 06:34

Isumaqatigiissut naapertorlugu timersortartut peqatigiiffii Sarfaq Ittuk-mut ilaallutik unammiartuleraangamik, pissartanngorniunnernulluunniit peqataajartuleraangamik, 20 procentit angullugit akikilliliivigineqarsinnaanngorput.

Timersoqatigiit Kattuffianni allattaanerup, Claus Nielsenip, isumaqatigiissut nuannaarutigeqaa.

- Ukiuni makkunani timersoqatigiiffiit aningaasanik katersuiniartarnerat ajornakusoorsigaluttuinnarpoq. Taamaattumik assut nuannaarutigaarput Arctic Umiaq Line GIF-mut isumaqatigiissusiorusussimammat, Claus Nielsen oqarpoq.

Umiarsuaatileqatigiillumi isumaqatigiissut aamma nuannaarutigaat, ileqqormi kusanartoq taamaaliornikkut ingerlateqqinneqarmat.

Timersortartunut imaatigut angallannermi akikilliliisarneq 2008-mi siullerpaamik atuutsinneqalerpoq. Isumaqatigiissulli naapertorlugu akikilliliiffigineqarniaraanni Timersoqatigiit Kattuffiat GFIF aqqutigalugu angalanissamut bilitsit inniminnerneqartassapput.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq