Timersornermi atortut apuussorput
Peqatigiiffiup "Atuarfimmi timersornerup" kommuni suleqatigalugu qaammatit marluk matuma siornagut, karsit timersornermi atortunik imallit kommunip nunaqarfiinut nassiussuuppai. Nunaqarfinnit tusakkat siulliit najoqqutaralugit karsit, atuarnerup nalaani timersornermik pinnguaatinilluunniit sammisaqartitsinissamut atortussanik imallit ilassilluarneqarput.
Nunaqarfinni atuarfiit pisortaasa oqaatigaat, atuartut anitsiarfinni nuannisarnerulerlutillu sammisassaqarnerulersut, aamma atuartut anitsiarfiit kingornagut atuartitsineq aallartikkaangat eqqissisimanerulersut.
Soorlu Illoqqortoormiuni atuarfiup pisortaata oqaatigaa, atuartut angajulliit minnerillu anitsiarfinni pinnguaqatigiittalersut.
Karsit timersornermi atortunik imallit taamaalillutik ukiut, suiaassuseq inooqatigiinnermilu assigiinngissutsit akimorlugit sammisaqaqatigiissinnaanermik pilersitseqataasut, "Atuarfimmi timersornermik" suliniuteqartoq Kim Godtfredsen allappoq.
Kommuneqarfik Sermersuumi taamatut iluatsittumik suliniuteqartoqareernerata kingorna, aningaasanik katersiniartoqalerpoq, taamaalilluni taamatut suliniuteqarneq nunaqarfinnut tamanut siaruarneqarsinnaaniassammat.
KNI A/S suliniummut soqutiginnittorujussuuvoq, 200.000 koruuninillu tapersersuiniarluni.
Nunaqarfiit 40-t ukiormanna karsinik timersornermi atortunik imalinnik nassinneqarsinnaanissaat anguniarlugu maanna aningaasassarsiortoqarpoq. Karsi timersornermi atortunik imalik ataaseq 15.000 koruunit missaannik akeqarpoq.
