Timaat nassaarineqanngillat

Ilisimasassarsiortut taakku timaasa Tunup Avannaarsuani Ingolfip Kangerluani Wegenerip Qeqertaasa kangisissuaniinnerannik ilimasunnerit taamaalilluni uppernarunnaarput. Ilisimasassarsiortut timaasa tamaaniinnerat, timmisartortartuusimasup, sakkutuut naalagaata oqaluttuarisaanermillu ilisimatuup, Paul E. Ancherip, sapaatip akunnerata ataatsip matuma siorna saqqummiukkaluarpaa.

Mylius-Erichsen Høeg-Hagen-ilu ilisimasassassarsiortillutik tammarmatali, inuppassuit ujaarisarsimagaluarpaat, mannali tikillugu tassa iluatsitsisoqanngilaq. Kalaallip ilisimasassarsioqataasup, Jørgen Brønlundip, timaa 1908-mili nassaarineqarpoq. Jørgen Brønlund ullorsiummik qimataqarsimavoq, tassanilu atuarneqarsinnaavoq Mylius-Erichsenip Høeg-Hagenillu timaat sumiinnersut. Taakkuli nassaarineqanngisaannarput, aamma massakkut naami.

Tunup Avannaarsuani qimussimik alapernaarsuisut, Siriusikkut, peqqumaatissaminnik piareersarneranni ikiuutissalluni Vædderen Tunup Avannaarsuaniippoq, taamaammat ilisimasassarsiortut timaasa sumiinnerannik tusatsiakkat kingulliit eqqornersut misissornissaannut periarfissarsigaluarlutik.