Tilluuttartut klubiannik Sisimiuni aallartitsisoqalerpoq
Tilluuttartut klubiannik Sisimiuni aallartitsisoqalerpoq. Sisimiuni aviiseeqqami, Sivdlek’-mi, tamanna atuarneqarsinnaavoq. Sisimiuni naatsorsuuserinermik suliffittaaqqammersup, Jan Richardip, illoqarfimmi inuusuttut timersuummik taassuminnga aallartitseqatiginiarlugit neqeroorfiginiarpai.
-Timersuumik taassuminnga ingerlatsiniaraanni - uanga nammineq isinnik isigalugu - piumassuseqartariaqarpoq, unammillernartuuvoq, nuannersuulluni peqqissutsimullu iluaqutaalluni, Jan Richard oqarpoq.
aggustip 05-at 2008 07:38
Sisimiuni inuusuttut taama neqeroorfigineqarnerannut danskeq tilluutillammassuaq, Brian Nielsen, toqqaannanngikkaluamik qutsavigisariaqarpoq. Brian Nielsenimi Korsørimi tilluuttartut klubianni ilaasortaasimavoq, Jan Richardilu klubimi tassani tilluunnermik aamma ilinniarsimalluni, Brian Nielsenillu angusarissaarluinnartarnera tunngavigalugu Jan Richard timersuummik taassuminnga nuannarilluinnalersimavoq.
Jan Richard Århusimi tilluuttartut klubianni ukiuni arlalinni sungiusaasuullunilu siulersuisuni ilaasortaasimavoq. Tilluunnermullu atortunik tassanngaanniit attartorsinnaavoq, atortunillu pisariaqartitanik akikitsunnguanngorlugit pisisinnaalluni, tilluuttartut Sisimiuni klubissaat aallartilluarniassammat.
