Tillinniartartutoqaq tigusaraat
Politiinik ilisimaneqarluartoq angut 33-nik ukiulik ippassaq sisamanngornermi Nuummi Eqqartuussivimmi killisiorneqareerluni ulluni 20-ni tigummigallarneqartussatut aaliangiiffigineqarpoq. Pasineqarpoq marloriarluni Namminersorlutik Oqartussani tillinniarsimasutut.
Killisiuisimanerup suna tunuliaqutigineraa, Nuummi politeqarfimmi vagtip Kasper Berthelsenip ippassa tamanna ima nassuiarpaa:
- Paasiniaaneq suli ingerlanneqarpoq, killisiorneqartorlu politiinik nalunnginneqareerami aamma allanik suliassaatigigatsingu taakkulu aamma ilanngunneqartussaammata, taamaammat sapaatit akunneri pingasunik tigummigallarneqartussatut aaliangiiffigineqarpoq.
Angut 33-nik ukiulik politiit tingusarisimavaat, tillitat nalillit tillinniarnerup kinguninngua internitsikkut tuniniarneqarnerisa kingorna.
Angutip tillinniarsimasup tillitani angummut allamut tunisimavai, pisisullu pisiani internitsikkut tuniniarsimavai nittartakkatigut, Sermitsiaq.AG-ikkut aamma Opslagstavlen.gl-ikkut.
Angut tillinniarsimasoq ippassaq unnukkut tigusarineqarpoq, Nuummilu Eqqartuussiviup aaliangerpaa decembarip 21-ata tugaanut tigummigallarneqassasoq.
