Tillinniaq ukiut aappaata affaanik pineqaatissinneqarpoq
Angutip inuusuttup angut 39-nik ukiulik immiaaqqamik ammarneqanngitsumik isaatigut milorpaa, immiaaqqallu puuata aseqquisa isaa qaarlugu. Tillinniarnermi immiaaqqat puussiaq mobiltelefonilu tillinneqarput.
19-nik ukiullip pisimasoq nassuerutigereermagu, immiaaqqanik puussiamik tillissimanera tunngavigalugu Nunatta Eqqartuussiviata angut inuusuttoq pisuutippaat. Pineqaatinneqarnermi saniatigut angut inuusuttoq allami tillinniarsimasutut aamma unnerluunneqarpoq aammalu Pisiffiit pisiniarfiisa ilaanni tillinniarsimasutut pisuutinneqarluni.
Unnerluussisut pineqaatissiissut akuereraat naak ukiut marluk pinerlussimasut inissiisarfianiittussanngorlugu unnerluutigigaluarlugu. Taama paasissutissiivoq politifuldmægtig Mette Damgaard.
19-nik ukiulik pineqaatissinneqarnermi saniatigut aningaasanik taarsiisussanngortinneqarpoq. 39-nik ukiullip isaata qanoq ajoqusersimatiginera apeqqutaalluni aningaasat taarsiissutigineqartussaassapput, aningaasanik qanoq amerlatigisunik taarsiinissaa qaammaterpaalunni suli utaqqineqartariaqassaaq, tassami nakorsat naliliinerat utaqqeqqaarneqassammat.
Eqqartuunneqartup illersuisuanik oqaaseqartitsiniaraluaratta iluatsinngilarput, eqqartuunneqartulli eqqartuunneqarnini akueralugu ingerlateqqinngilaa.
