Tilioq innarluutillit pillugit meeqqanut atuakkiamik saqqummersitsisoq

Ullumi decembarip ulluisa pingajuat Naalagaaffiit Peqatigiit inunnut innarluutilinnut ullorititarivaat.

Tassunga atatillugu inuit innarluutillit illersuisoqarfiata, Tiliup meeqqanut atuakkiaq, atuakkiortumit Anette Hvid Thomsenimit atuakkiarineqartoq saqqummersippaa.

Meeqqanut atuakkiaq 'Rosap aqqalua innarluuteqarpoq'-mik qulequtaqarpoq.

Tiliup oqarnera naapertorlugu atuakkap meeqqat inuit innarluutillit pillugit ilinniartissavai. Innarluutillit illersuisuat tusagassiuutinut nalunaarummi allappoq.

- Ajoraluartumik inunnut innarluutilinnut pigiliutiinnakkanik suli annertuumik isumaqartoqartarpoq. Meeqqat ammasumik isumaliortaaseqarput aamma ilikkartikkuminartuullutik, taamaammat isumaqarpugut pingaartuusoq ilinniartissallugit inuit assigiinngikkaluarlutik tamarmik assigiimmik naleqarmata, tamattalu ikinngummik pisariaqartitsisugut, Christina Johnsen oqarpoq.

Inuit qanorluunniit isikkoqaraluarunik naleqartut atuakkiami oqariartuutigineqartoq, Tilioq ilanngullugu oqarpoq.

Atuagaq kalaallisut danskisullu allassimasoq saqqummersinneqassaaq, taannalu nunatsinni meeqqat atuarfiinut atuakkanillu atorniartarfinnut 2021-p aallartinnerani akeqanngitsumik agguaanneqassalluni.

Atuakkamut ilanngullugu ilitsersuut atuartitsinermilu atorneqarsinnaasut ilinniartitsisup inuit innarluutillit pillugit oqaluuserinninnissamut isumassarsiorfigisinnaasai aamma ilaatinneqassapput.

Atuakkiortoq, Anette Hvid Thomsen meeraalluni nunatsinni ukiuni qulini najugaqarsimavoq. Taassumami angutaa 70-it naajartornerani nunatsinni ilinniartitsisutut sulisimavoq.

Anette socialpædagogitut 1996-imili ilinniarsimavoq, atuakkianilu Kalaallit Nunaanni saqqummersikkamiuk nuannaarutigaa.

– Atuakkiap saqqummersinneqarnissaa sinnattorisimavara, maannalu piviusunngorpoq. Uummammiora saqqumilerpoq. Inuit pineqartut ilisarisimavakka aamma atorsimasaat atuakkiami ersersinneqarput. Imatut suliaqarnermi inuit innarluutillit oqariartuuteqartinneqarput.

- Ilisimalluinnarparalu Kalaallit Nunaanni suliniaqatigiiffiit kattuffiillu ulluinnarni qasusuillutik taamatut suliniuteqarput. Uangalu innarluuteqarnermut tunngasuni ineriartortitsinermi imatut tapersiuteqarpunga, Anette Hviid Thomsen oqarpoq.