Misigissutsit: Meeqqanut qimagutitinneqarsimasunut aaqqissuussaq sivikillisarneqartoq
Uummannap sulluani tassaarsuartoqarnerata kingorna Juaaka Lyberthip meeqqanut inuusuttunullu erinarsornikkut taalliornikkullu sammisaqartitsinera sivikillisarneqarsimavoq.
Meeqqat inuusuttullu qimagutitinneqarsimasut misigissutitik oqaasertalernissaat piareersimaffigisimanngilaat, Juaaka Lyberth oqaluttuarpoq:
- Piffissap ingerlanerani paasinarsigami eqqarsaataat suli allamiittorujussuusut aamma paasinartumik taamaattumik sapaatip akunnera ingerlatiinnariarlugu tassunga killiinnarallarparput aamma allarpassuarnik suliassaqarmat.
Aaqqissuussaq Kalaallit Røde Korsianit suliarineqarsimasoq pilersaarutit malillugit sapaatit akunneri marluk ingerlanneqartussaagaluarpoq.
Oqaasertaliinissamut piareersimanngitsut
Eqqugaasut misigissutitik oqaasertalernissaannut piareersimanngitsut sapaatip akunnerata siulliup ingerlanerani erserpoq.
- Tassaarsuaqarnerani misigisimasat tikikkiartorneranni nunaqarfimmiut paasivakka suli oqaasertalersuinissaminnut taallanngorlugit piareersimanngitsut, Juaaka Lyberth oqarpoq.
AAMMA ATUARUK Taalliornikkut erinarsornikkullu meeqqat inuusuttullu oqaasinngortitsissasut
Qallunaat Røde Korsianneersoq Dennis Kjeldsen maannakkut Uummannamiittoq uppernasaavoq:
- Siusippallaartoq takusinnaavarput. Tassami taalliornissaminnut eqqarsartariaatsimikkut piareersimasimanngimmata.
Tusarnaartitsinerit marluk
Juaaka Lyberthip Røde Korsillu innuttaasunut tusarnaartitsinermut piffissaq atuinnarsimavaat.
- Juaaka marloriarluni meeqqanut inersimasunullu tusarnaartitsivoq, taannami tusarnaartitsinermut pikkorissorsuummat, Dennis Kjeldsen qallunaat Røde Korsianneersoq taama oqarpoq.
