ASSIT Spaniami atuartut inuit timersuutaat alutorsaatigigaat
- Feeriarluta Spaniami ikinngutivut tikeraarpagut, Nunatsinnilu inuunitta oqaluttuarinissaanut atuarfinnut qaaqqusaavugut, Helga Nielsen paninilu Spaniami sapaatit-akunnerata siuliani feeriarsimasoq KNR-imut taama oqaluttuarpoq.
Panigiit illoqarfeeqqami Prado del Raeimi meeqqat atuarfianni ilinniarnertuunngorniarfimmilu oqalugiarput, aamma illoqarfimmi Cevico Naveromi atuarfimmi oqalugiarnissartik angumeraat.
Helga Nielsenip kalaallisuuni atuartunut takutippai inuillu timersuutaannik ilitsersuullugit, spaniamiullu atuartut soqutiginnilluarput:
- Inuit timersuutaat soqutigisupilussuuaat, ingammik one foot high kick aamma two foot high kick. Aamma arsaaraq orpimmut nivinngarsinnarlugu isimmeriartarnissaanik sungiusarnissaannut ilinniartippakka, Helga Nielsen KNR-imut taama oqaluttuarpoq.
