Ilisimatooq: Camp Centurymi igitat qimaannakkat nakkutigineqarlik
- Camp Centurymimi assaatissagaanni akissuallaassaqimmat, maannakkorpiaq iliuuseqarnissaq innersuutigerusunngilara, silap sermillu pissusianik York Universitymi ilisimatooq, William Colgan oqarpoq.
Amerikamiut sakkutooqarfigisimasaat Camp Century, Pituffimmiit kangimut 200 kilometerinik Sermersuarmiittoq, pillugu misissuinerni taanna siuttuusimavoq.
William Colgan oqaluttuarpoq, sakkutooqarfikoq sermimi maanna 35 meterisut ititigisumiitoq, tamaammallu mingutsitsinerup piiarnissaa akisussaqisoq. Aamma mingutisitsissutit qularnaatsumik sermimik pooqqapput, avatangiisinik ulorianartorsiortitsinatik.
Sakkutooqarfilli qimataq PCB ulorianarnersaralugu toqunartulinnik igitaqaqimmat nakkutigineqartariaqarpoq.
- Camp Centurymi 9200 tonsit missaannik qimaannakkanik igitaqartoq ilisimavarput, igitallu taakku assersuutigalugu procentimik ataasiinnannguamilluunniit PCB-eqarpata, PCB angivoq, William Colgan oqarpoq.
PCB avatangiisinut ulorianarluinnarpoq, ingammillu nannut tassannga ajoqusiaqisut paasineqareerpoq. Taanna aamma inunnut ulorianarpoq - ajoqutaalu naartusut pujortartarnerattut aalakoornartulimmillu imigassartortarnerattut naleqartoq, Colgan oqarpoq.
Ilisimatooq naapertorlugu Camp Centurymi mingutsitaq sermeq aatsinnagu sakkutooqarfikorlu nuitinnagu iluarsineqartariaqarpoq.
- Sermip qaavata aannera sermip iluanut sitsiutissaaq, erngullu Camp Century aqqusaarpagu taassuma saqqummernissa sioqquteqalugu tassani akuutissat kuugutissavai, William Colgan oqarpoq.
PCB-p saniatigut aamma reaktorip nillusaataanik ulorianartumik qinngulanertalimmik Camp Centurymi qimataqarpoq. Qinnulanilimik taama mingutsitsinerup timmisartorsuup B52-ip Pituffiup eqaani 1968-imi nakkartup qinngulanilimmik mingutsitsinerata tusinteratserutigigaa, William Colgan nassuiaavoq.
Ilisimatooq naapertorlugu, igitakut sermermit saqqummeralissappata, tamakkua qanoq piiarnissaat ilisimaneqareerpoq. Politikkikulli isumaqatigiissuteqarnissaaq pingaarnerusoq William Colganip tikkuarpaa.
