Tikinngitsuulerput

Silap Air Greenland minnerunngitsumik timmisartortitseqatigiiffiup Upernaviup Tasiilallu nunaqarfiinut ilaasui uumisaartuarpai.

Tassami tamatuma kingunerissavaa taakkua ullumikkut apuuffissaminnut annguttussaanngimmata.

Upernavimmi isikkiviluppoq, taamaalillunilu helikopterip manna tikillugu Kullorsuarmut ilaasut sinneruttut 13-it angallassinnaanagit. Ippassaq timmisartuussineq ataaseq ingerlanneqarpoq, ilaasunulli tamarmiusunut inissaqarani.

Tunumi aamma ullumikkut suli anorersuarpoq, tamatumalu kingunerissallugu ilaasussat sinneruttut ukiutoqaq tikillugu aamma anngunneqarsinnaassanngimmata. Taakkua juullip siornatigulli uninngasimapput. Tamatumani inuit 19-it Tasiilap nunaqarfiinut anngunniartut pineqarput taavalu 14-it nunaqarfinniit Tasiilaliartut.

Ullumikkut anngutitinniarnissaat iluatsissanngippat aqagu misileeqqittoqarniarpoq.

Aappaatigulli Air Greenland ullumikkut imarpik qulaallugu immikkut timmisartuussivoq, ilaasut Danmarkiliartut kingulliit 26-t angallannissaannut angalatinneqartumik. Taakkua Sisimiuniit aallartussaagaluarput ippassarli silap ajornera pissutigalugu timmisartumut Danmarkiliartumut anngussinnaasimanatik, taavalu timmisartortitseqatigiiffiup timmisartuutini Boeing Kunuunnguaq ullumikkut immikkut timmisartuussisussanngorlugu timmisilerlugu.

Taanna Kastrupimit aallarpoq taamaallaat inuussutissanik 3,5 tonsinik useqarluni ippassaq inissaqartinneqarsimanngitsunik. Taannalu Danmarkimut uteruni ilaasunut Sisimiuneersunut 26-nut inissarpassuaqassalluni.

- Tamanna soorunami amigartoorutaassaaq, aammali immikkut kiffartuussinerulluni, kikkut tamarmik nalliuttuni sapinngisamik ilaquttaminnut anngunnissaat sulissutigaarput, Air Greenlandip timmisartuussinermut immikkoortortaaneersoq Niels Frederiksen nassuiaavoq.