Tikeraat isornartorsiorneqartut

KNI Pilersuisup qullersaasa nuna tamakkerlugu susassaqarfimminnut angalanerinut atatillugu Nanortallip, Qaqortup Narsallu, taakkualu nunaqarfiisa qulingiluat, pisiniarfii pisortaanermit Søren Mortensen–imit siulersuisuillu siulittaasuanit Simon Olsen-imit tikeraarneqaqqammerput.

- Nioqqutissat inuussutissaanngitsut nunaqarfippassuarni sivisuallaamik uninngasuutigineqarput, taama oqarpoq Lars Boassen Qaqortup pigisaani Eqalugaarsunni niuertoq nangipporlu.

- Soorunami nunaqarfimmi pitsaanerpaamik ingerlassappat pisiniarfik ullutsinni naleqquttunik atortoqartariaqarpoq. Qeritsitsiveqartariaqarpoq aamma massakkut atortorissaarutit nalaanikkatta, soorlu qarasaasiat atorlugit sullissinerit ingerlasarput.

Avatangiisit sunniutilerujussuusarput, ullormiit ullormut qaammammiit qaammammut pisisartut naalagaammata.

- Soorlu massakkut aasamanna eqqarput saarullilerujussuuvoq, fabrikkeqaraluarlutta matoqqavoq ingerlannginnami. Taamaasillutik aalisartortavut illoqarfimmut tuniniaasarput, taannartaa soorunami nunaqarfimmut sunniuteqalaarpoq isertitassaagaluatta ilaat illoqarfimmut isertinneqartarmata, Lars Boassen erseqqissaavoq

Nunaqarfiit kujataaniittut allat assigalugit Eqalugaarsunni 100-t sinnilaarlugit inulimmi nioqqutissat inuussutissaanngitsut tuniniarniarneri ajornartorsiutaanersoq apeqqutigineqarmat, Lars Boassen akivoq, namminneq aamma assinganik ajornartorsiuteqarlutik.

Ajornartorsiut tamanna Alluitsup Paani assut ajornartorsiutaavoq siorna raajaleriffiup 70–inik sulisullip matunerata kingorna nioqqutissanik inuussutissaanngitsunik tuniniaaneq unilluinnangajaasimammat, taama ilisimatitsivoq Pilersuisumi niuertoq Apollonia Karolussen.

Nunaqarfiit tikinneqartussat 63 –iupput taakkunanngalu qulit taamaallaat tikinneqarsimanngillat.

KNI Pilersuisup pisortaanera Søren Mortensen oqarpoq, nutaaliornissamut periarfissanik ujartuilluni tikeraarnerit siunertaqartut kingusinnerusukkut siulersuisuni oqaluuserineqartussat.