Tikaagullittut aarlunnit upanneqartut
Jonas Lyberthikut ippassaani tikaagullereerlutik kalillugu aallartikkamikku takulersimavaat aarluit tallimat ungasiartut qanillattoraluttuinnartut imalu pisoqarpoq:
-Kalitannguakkulupput tikaagullik taanna persaralugu aallartikkamik qinngarnarujussuaqaat aatsaat taamak uumasunik qinngarnartigisunik, tallimaata mikakkamiuk talluata killingagut qiporaatigut oqartalerlugu taava taamaaleriarmat allatut iliusissaqannginnatta pisarput erligigatsigumi eqqaakkatsigit eqqaallugu uungaaraq tallimaasut – marluk avallaqqukkamik aallaasagut taava ilai taakku sooq taamak soqutigisaqanngitsuginerput angallatinik aallaasinillu immaqa kaattupalaarsuusimagunaramik eqqaallugit pillugit pillugit aatsaat qimagupput, angallatit allat ornikkaatigut tungaanut ingerlagatta sakkortuumik ingerlasukaangatsiarluta taakku angallatit tikaagullinniaqatitta persarissammatigit uagut qimagunniarlugu pisarput taava tassani aatsaat qimakkiartorusaaleramisigut.
Taamatut oqaluttuarpoq Jonas Lyberth qatanngummi angallataani tikaagulleqataasimasoq. Allatut ajornartumik angallatit eqqaminniittut ikiortissatut nalunaarfigisimavaat, Jonas Heilmannikkullu ornigussimapput aarluit pingasut tikaagullimmik kalitamik malersuisut qimaasariartorlugit. Jonas Heilmann oqarpoq takornartaanngitsoq uumasoqamminnik malersuisut aarluit takusarnerat imalu nangippoq:
-Kisianni taamannak angallatinik pisaqarsimasunik malinninnerat assut eqqumiiginarpoq tupinnalaarlunilu amiilaarnalaarlunilu taamatut tusarnikuunnginnama angallaterpaluttummi ersigisarmatigit.
