Tikaagullittassat sinneruttut pisassiissutigaat

Kalaallit Nunaata Kitaani tikaagullittassat sinneruttut tamakkerneqarnissaat qularnaarniarlugu, arfattassanik agguaasartoqatigiit tusarniaavigereerlugit, Piniarnermullu Naalakkersuisup akuersineratigut, aalajangerneqarpoq, qoorortoorsorluni tikaagullittassat sinneruttut agguataarneqassasut.

Tikaagullittassat sinneruttut tallimaapput, Piniarnermullu Pisortaqarfiup taakku agguaateqqippai, taamaalillutik sinerissami piniarneqarniassammata. Tassa taakku qoorortoorsorluni pisarineqartussat tassaapput:

Nanortalimmut pingasut, Paamiunut ataaseq aamma Qasigiannguanut ataaseq. Qeqertarsuup Narsallu kommuniini umiatsiaararsortut qoorortoorsorluni pisassamik tamarmik immikkut tunineqassapput.

Taavalu Nanortallip kommuneani angallatit qamutilillit pissasamik ataatsimik aamma tunineqarput.

Tikaagullinniarnissaq tassa aallarteriaannaavoq – tikaagullittassat tallimat taakku pisarineqarpata – sinerissami sumiluunniit – ukioq manna tikaagullinniaqqittoqassanngilaq.

Piniarnermulli Pisortaqarfiup ilisimatitsissutigaa, tikaagulliusaartassanit 16-iusunit sisamat suli pisarineqanngimmata.