Tikaagullittassat affaasa missaannaat pisarineqassagunarput

- Ukioq manna tikaagullinniarneq aggustip ulluisa 31-anni taamaatissaaq. Angallatit 21-t apriilip ulluisa aallaqqaataanniilli tikaagullinnialerput. Ukiormanna pisassiissutigineqarput 885-it, takusinnaasavulli malillugit taakku affaasa missaannaat tassa pisarineqassapput, Per Rolandsen, Svolværimi tunisassiorfimmi, Norges Råfisklagerimeersoq, ilisimatitsivoq.

Tikaagullinniarfiit kujataani Nordsømiit, Norgep sineriaa tamaat atuarlugu avannamut Svalbardip tungaanut kangimullu Novaja Semljap tungaanoorput. Norgimiut arfanniartartut Jan Mayen ingalassimaarsimavaat, tamaanga arfanniassalluni akisuallaaqimmat, naak pisassiissutigineqartunit 135-t tamaani pisarinissaat tikaagullinnianut immaqa ussernartorsiornaraluartoq, Rolandsen oqarpoq.

Norgimi Immamik ilisimatusarfimmeersup, ilisimatusartup Tore Haugip, ilisimatitsissutigaa, 1989-imi kisitsinerit takutikkaat, tikaagulliitnungusaataanngitsumik piniarneqartut. 2002-miit 2007-imut kisitsinerit kingulliit takutippaat, Norgip imartaani tikaagulliit 107.000-iusut.

Tikaagullittassat amerlineqarniannginnerannut suna pissutaanersoq apeqqutigineqarmat Tore Hauge akivoq:

- Politikki! Politikki kisimi arfanniarnermullu nunarsuaq tamakkerlugu akerliunerat tamatumunnga pissutaavoq. Tuniniaaneq pitsaanerusuuppat tikaagullittassat immaqa atorluarneqarnerusinnaagaluarput.