Tikaagullinniarneq unitsinneqarpoq

Uummannap Kommuniani qoorortoorsorluni tikaagullinniarneq Aalisarnermut Piniarnermullu Pisortaqarffimmit ingerlaannartumik unitsinneqarpoq, akuersissutillu tunniunneqareersimasut utertinneqarlutik.

Tikaagulliusaarnamik ippassaq pisaqartoqarnera pissutigalugu qoorortoorsorluni tikaagullinniarneq unitsinneqarpoq. Tikaagulliusaarnaq Kalaallit Nunaanni eqqissisimatitaavoq.

Piniartut tikaagulliusaarnamik pisaqartut Pisortaqarfiup politiinut nalunaarutiereerpai.

- Arfermik eqqissisimatitamik pisaqarneq unioqqutitsineruvoq imaannaanngitsoq, Piniarnermut Pisortaqarfimmi allaffissornermut pisortaq, Ole Heinrich, oqarpoq.

Tikaagulliusaarnaq tikaagulliup tikaagulliusaallu angissusaasa akornanni angissuseqarpoq, tikaagulliusaarnarli tikaagullimmit annerummat, tikaagulliusaarlu qoorortuumik aallaaqqusaanani, aallaaneqartup tikaagulliusaarnaanera takkuitsoorneqarsimasinnaanngikkaluarpoq. Tamannali piniartut politiillu akunnerminni oqaloqatigiissutigiussavaat, Ole Heinrich Radioavisimut oqarpoq.

Arfernik angisuunik piniarnissamut nalunaarummi erseqqissumik allassimavoq, arfermik eqqissisimatitamik pisaqaraanni, pisassat ikilisinneqarnerannik tamanna kinguneqarsinnaasoq, aappaagumullu pisassat Pisortaqarfiup aamma ilanngarsinnaallugit. Uummannalli ukioq manna tikaagullittassaa ataasiinnanngorsimammat, tikaagullinniarneq ingerlaannartumik unitsinneqarpoq.

Tikaagulliusaarnap ilai nerineqarsinnaasut pisortat suliffeqarfiinut, soorlu utoqqaat illuinut, agguaanneqassapput.