Tikaagullinniarneq aqagu apriilip aallaqqaataani aallartissaaq

Tikaagullinniarneq aqagu apriilip aallaqqaataani aallartissasoq, Aalisarnermut Piniarnermullu Pisortaqarfimmit nalunaarutigineqarpoq.

Kitaani 175-nik tikaagulittassiisoqarpoq, Tunumilu 14-it pisassiissutigineqarlutik.

Kitaani ukiumut tikaagullittassanit 175-iusunit 135-it qamutilimmik tuukkartalimmik, 40-llu piniaqatigiilluni, tassa qoorortoorsorluni pisarineqassasut aalajangiisoqarpoq. Tamanna Aalisarnermut Piniarnermullu Naalakkersuisoqarfiup KNAPK-p, KANUKOKA-p aamma Aalisarnermut Piniarnermullu Pisortaqarfiup ataatsimeereerneratigut aalajangiiffigineqarpoq.

Tunumi piniaqatigiinnermi tikaagulliit 14-it pisassiissutigineqarput.

Qamutilimmik tuukkartalimmik pisassat tikaagulliit 135-usut angallatinut ukiuni kingullerni pingasuni tikaagullinniarsimasunut aammalu tuukkartalimmik qamutililinnut piumasaqaatinik naammassinnissimasunut paggatassiissutigineqarput.

Tikaagullinniarnissamut akuersissut ataaseq aggustip 31-iata tungaanut atuutissaaq, piniarnermi pisat qanoq inissisimanerat septemberip aallaqqaataani naliliiffigineqartussaammat.