Tiilerilaami nukappiaqqap ukiukitsup toqutsinera misissuiffigineqartoq
Tiilerilaami nukappiaqqap ukiukitsup angut aallaallugu toqutsineranut suliaq suli misissuiffigineqarpoq, politiillu paasissutissanik sukumiinerusunik tunniussisinnaanngikkallarput:
- Inatsit tunngaviusoq aallaavigalugu matut matoqqatillugit killisiuisoqarpoq, taamaammat paasissutissanik sukumiinerusunik tunnissisinnaanngikkallarpugut. Qanorpiaq pisoqarsimanersoq paasiniarneqaqqaassaaq, taamaammat oqaaseqarsinnaanngikkallarpugut, Tobias Berg, Politimestereqarfimmeersoq KNR-imut oqarpoq.
Nukappiaraq 18-it inorlugit ukiulik arfininngornermi juulip ulluisa aappaanni unnukkut nalunaaquttap pingasup missaani aaqqiagiinngissuteqarnermik pissuteqarsorineqartumik angummut 30-kkunni ukiulimmut aallaariarpoq. Angut eqqorneqarpoq, toqukkullu kingorna qimagulluni. Politiit tusagassiuutinut taama nalunaaruteqarput.
Nukappiaraq inatsit tunngaviusoq naapertorlugu arfininngormat kingusinnerusukkut killisiorneqarpoq, toqutsisimasutullu unnerluutigineqarluni.
Nukappiaraq tigummigallaanermut taarsiullugu angerlarsimaffimmut immikkut isumannaallisakkamut ulluni 27-ni inissinneqarallartussanngortinneqarpoq.
Nukappiaqqap angerlarsimaffimmut immikkut isumannaallisakkamut inissinneqarallartussanngortinneqarnera sivitsorneqassanersoq kingusinnerusukkut nalilersorneqarumaartoq Tobias Bergip KNR-imut oqaatigaa.