Tiigerit nujuartat nungutaalerput

Tiigerit piniapilunneqartarnerat pissutaalluni, tiigerit javat, balit aamma kaspiske tiigerit nungutaareerput, amiisa saarngisalu tuniniarneqartarneri pissutaallutik nungutaagamik.

Tiigerit nungutaalernerat pillugu tiigerit pillugit ataatsimeersuarneq Ruslandimi Sankt Petersborgemi ippassaq aallartinneqarpoq, Ruslandimi ministeriuneq ataatsimeersuarnermut qaaqqusisuulluni.

Tiigerit amerlassusiisa marloriaatinngortinneqarnissaannut qanoq iliorluni aningaaliisoqarsinnaanersoq Asiami naalagaaffiit 13-it pisortaasa pingasunngornerup tungaanut oqallisigissavaat. Tamanna anguniarneqassaaq tiigerit ukiuat ukioq 2022-mi nalliussineqartinnagu.

- Tiigerit aalajangersimasut pingasut nungutaareerput, tiigereqatigiit allat arfinillit uumaannarnissaat qularnarpoq, ataatsimeersuartunit oqaaseqaat taama nipaqarpoq.

Kinap ministeriunerata, Wen Jiabaop, ataatsimeersuarnermi peqataanissaa naatsorsuutigineqarpoq.

Ilisimatuut oqarnerat malillugu, nunarsuarmi tiigereqaannassappat, nunat pingaarnerullutik inissisimasut tassaapput Kina aamma India.

Nunarsuarmi tiigerit affaat tikingajallugit Indiamiipput.

Kina tiigerinit pisunit nunarsuarmi atuinerpaasutut ajorineqaraluarluni, suli atuisuuvoq. Tiigerit saarngi isigaalu tissassinnaajunnaarnermut katsorsaatitut ilaatigut atorlugit iluatsissinnaanerat kinamiorpassuit upperaat.

Nunat tiigereqarfiusut ataatsimeersuarnermi peqataasut tassaapput, Bangladesh, Bhutan, Cambodja, India, Indonesia, Laos, Malaysia, Myanmar, Nepal, Thailand aamma Vietnam.