Tigussaasumik siunnersuusiortoqartariaqarpoq
Ataatsimiititaliaq nammineq suleqatigiissitaliortitsinissaminut pisinnaatitaaffeqannginnami Nunatsinni Danmarkimilu Naalakkersuisut suleqatigiissitalioqqullugit kaammattorpai.
Ataatsimiititaliami siulittaasup, Lars-Emil Johansenip Foreningen Grønlandske Børnip aamma Unicef Danmarkip suleqatigiiffissami peqataatitaqarnissaat takorloorpaa.
- Misissuinerit aamma ataatsimiititaliornerit, kommissioniliornerillu amerlaqisut pisareersimammata, piviusunngortitassat suunissaat pingaarnerutillugit sulisoqarnissaa ullumi ataatsimiinnitsinni siunnersuutigaara. Aamma ikiorsiissutaasussat inunnut ikiorneqarnissamik pisariaqartitsisunut toqqaannartumik tunniunneqarnissaat sulissutigineqartariaqarpoq, Lars-Emil Johansen oqarpoq, nangillunilu:
- Taamaattumik Danmarkimi nunatsinnilu naalakkersuisut suleqatigiillutik Foreningen grønlandske børn aamma Unicefip Danmarkimi immikkoortortaqarfia suleqatigalugit piffissami sivikitsunnguami suliniutissanik nassaarniartariaqarput.
- Uani naalakkersuisut siulittaasuata nersornartumik iliuusaannut isornartorsiuisoqanngilaq. Kisiannili Danmarkip aamma Kalaallit Nunaata ataavartumik sivisunerusumillu suleqatigiissutigisinnaasaannik nassaarniarnissaq siunnersuutigineqarpoq, Lars-Emil Johansen oqarpoq.
Folketingip Nunarput pillugu ataatsimiititaliaanit Foreningen Grønlandske Børn kiisalu Unicef Danmark februaarip ingerlanerani ataatsimeeqatigineqassapput.