Tigusarineqartut amerlipput
Londonimi Glasgowimilu peqqarniisaarniarnerit pinngitsoortinneqarsimasunut tunngatillugu Australiami politiit inunnik tigusarinnissimapput.
Napparsimmaviit arlallit politiinit misissoqqissaarneqarsimapput, nakorsallu sisamanit ikinnerunngitsut tigusarineqarsimapput killisiorneqarlutillu.
Danmarks Radio-p tusagassiortua Mads Graversen taama tusarliussivoq.
Qarasaasiat oqarasuaatillu angallattakkat politiinit ujaarineqarput. Londonimilu Glasgowimilu pisimasut tunngavigalugit Australiami politiit ulappupput.
Brisbane-imi, Australiap kangisissortaaniittumi, nakorsaq Indiaminngaanneersoq siusinnerusukkut tigusarineqareerpoq, Australiallu kippasinnerusortaani politiit ullumi misissueqqissaarput, napparsimmaviit sisamat misissuiffigineqarlutik.
Nakorsat Indiaminngaanneersut sisamat killisiorneqarput. Nakorsat taakku Tuluit peqqinnissaqarfianni siornatigut sulinikuusimapput, nakorsarlu Brisbane-imi parnaarussaaqqasoq suleqatiginikuusimallugu.
Parnaarussaaqqasut allat arfineq-marluusut Tuluit Nunaanni unnerluussinertaqanngitsumik parnaarussaaqqapput.
Taakkunanit tallimat ukiualunnguit matuma siornatigut universitet-eqarfissuarmi Cambridge-imi ataatsikkut najugaqarsimapput, islamimillu ingasaassiniarneq tassani inuusaaserilersimagaat politiinit ilimagineqarpoq.
Tigusarineqarsimasut al-Qaeda-mut attaveqarnersut imaluunniit Irakimi al-Qaeda-kkunnut attaveqarnersut misissorpaat.
Tigusammi ilaat ataaseq Irakimingaanneerssuuvoq, peqqarniisaarniaraluarnernullu siuttuusimaneragaalluni.
Nunat killiit USA-mit aqunneqartumik Irakimik saassussinerat iluarinngilluinnarini siornatigut oqaatigisarsimavaa.
Londonimilu Glasgowimilu qaartartumeeriniaraluarnerit peqqissaanngitsumik suliarineqarsimanerat Tuluit politiivisa tupigusuutigaat.
Inunnik eqquisoqarsimanngilaq, peqqarniisaarnianullu tikkuussisunik takussutissarpassuaqartoq politiit oqaatigaat. Imminorniarluni allatat takussutissanut ilaapput.