Tigusanut inatsit nutaaq
Peqqarniisersimasutut pasineqarlutik tigusarineqarsimasut amerikamiunit killisiorneqartarneri eartuunneqartarnerilu pillugit nutaamik inatsisiliaq præsident George Buship ippassaq atsiorpaa.
Tigusat killisiorneqarnerisa nalaanni annersarneqartannginnissaat inatsisitaami illersorneqarpoq. Peqqarniisaarniaasorisanittaaq tigusarinnninnerit eqqartuussisumit akuerineqaqqaartariaqanngitsut allassimavoq.
Parnaarussivimmi Guantanamomi peqqarniiserniarsimasutut tigusarineqarsimasut eqqartuunneqartalernissaat inatsisitaami aqqutissiunniarneqarpoq.
- Isertortumik paasiniaasartoqatigiit CIA-kkut peqqarniiserniartartunik taamaalillutik apersuisinnaatitaalerput inunnillu annaassisarlutik, Bush oqarpoq.
Inatsimmi erseqqissarneqarpoq tigusat naalliutsinneqassanngitsut, pinngitsaalillugit atoqatigineqassanngitsut akuutissanillu atuilluni misissuinerni peqataatinneqartassanngitsut – taamaattorli tigusanik killisiuinermi periutsit sorliit atorneqarnissaannut præsidenti aalajangersinnaatitaavoq.
