Tigusanik angallassisarneq pineqanngilaq

Tassa oqaatigineqaraluarmat peqqarniisaarnianik akiuiniarneq pineqartillugu Danmarkip silaannartaata mittarfiisalu atorneqartarnissaat danskit naalakkersuisuisa akuerisimagaat, nutaarsiassaqartitsivik Ritzau’s Bureau taama allappoq.

NATO-mi isumaqatigiissut sammineqaqqilerpoq qallunaat angallannermut ministeriata Carina Christensenip isumaqatigiissut ilisimasaqarfiginnginnerarlugu oqaatigimmagu.

Anders Fogh Rasmussenip erseqqissarpaa, NATO-mi isumaqatigiissut CIA-p tigusanik timmisartuinnaat atorlugit isertortumik angallassisarsimaneragaaneranut attuumassuteqanngimmat.

- Matumani pineqartoq tassaavoq, sakkutuut timmisartunik qulaassisinnaanerannut akuersissut. CIA-p tigusanik angallassisarsimaneragaanera pineqanngilaq. Isumaqatigiissut taanna NATO-mi qullersat 2001-imi oktobarimi ataatsimiinneranni aalajangiunneqarpoq. Danmarkip ministeriunera oqarpoq.

Nunatsinni nunanut allanut naalakkersuisoq Aleqa Hammond sapaatip akunnerani uani Radioaviisimut oqarpoq:

- CIA sakkutuujunngitsut timmisartui atorlugit tigusanik angallassisarsimappat, tamanna allarluinnaassaaq. Taamaassimappat tamanna ilungersunartutut isigaarput. Tassami sakkutuujunngitsut timmisartui atorlugit CIA angallassisarsimassappat, tamanna nunat tamat timmisartuussisarneq pillugu isumaqatigiissutaannut unioqqutitsinerummat.

Taama pisoqartarsimassappat Danmarkip Kalaallit Nunaannut utoqqatsernissaa naammanngilaq. Tamannali nunat tamat akornanni suliassaassaaq, Nunanut allanut naalakkersuisoq Aleqa Hammond sapaatip akunnerani uani siusinnerusukkut oqarpoq.