Thulemi sulisuusimasut allaanerunngillat
Amerikamiut timmisartorsuat B-52, qaartartunik useqarluni Thule-p eqqaani 1968-imi nakkarmat, nakkarfiup nalaani saliisimasut allanut naleqqiullutik napparsimanerunngitsut, kræfti pillugu suliniaqatigiiffik misissuititsereersorlu naliliisoqarpoq.
- Ukiut qulit ingerlanerini misissuisimanerit ingerlasimapput, piffissallu taassuma ingerlanerani Thule-mi sulisuusimasut arlallit toqusimallutik. Thule-mili sulisuusimasut toqqutigisartagaat inunnut allanut naleqqiullugit allaanerungaanngillat, Danmarkimi Kræfti akiorniarlugu suliniaqatigiiffimmi nakorsaaneq Hans Storm ritzau-imut taama oqarpoq.
Thule-mi sulisuusimasut peqatigiiffianni Danmarkimiittumi siulittaasoq, Jens Zinglersen oqarpoq misissuisimanerni kisitsisit atorneqartut tatigisassaanngitsut.
- Misissuisimanermut tunngasoq aatsaat tusarpara, isumaqarpungali misissuisimanermi kisitsisit atorneqartut nutaanngippallaartut nutaartaqanngitsullu, Thulemi sulisuusimasut peqatigiiffianni siulittaasoq Jens Zinglersen oqarpoq.
Ilisimatusarfik Risømiittoq misissuereerluni Oktoberip qaammataani ukioq kingulleq oqarpoq, Thulep eqqaani Narsaarsummi plutoniummimik mingutsitsisimaneq avatangiisinut peqqissutsimullu pitsaanngitsumik sunniuteqarsinnaasoq, misissuilluartoqarnissaalu ilisimatuunit siunnersuutigineqarpoq.
Thulemi sulisuusimasut peqatigiiffianni siulittaasoq Jens Zinglersen oqarpoq, inuit Thule-mi sulisimasut peqqissusaat misissuiffigilluarneqartariaqartoq, kisitsisillu nutaanerit atorneqartariaqartut.
- Isumaqarpunga kisitsisitoqqat atorneqarsimasut, taamaammat qinngornerit ulorianartut pillugit ilisimasallit misissuitinneqartariaqarput. Thule-mi saliisimasut nappaatigisartagaat nalinginnaanerusut tassaapput, amikkut nappaatit, ilaatigut nappaat qaqutigoortorujussuaq, Psoreasis angplat-mik taaguutilik Thule-mi sulisuusimasut arfineq pingasuusut maannakkut nappaatigivaat, tamannalu agguaqatigiisillugu annertuallaarpoq, Jens Zinglersen oqarpoq.
