Thue Christiansen 70-inik ukioqalerpoq

Eqqumiitsuliortoq Thue Christiansen ullumi 70-inik ukioqalerluni inuuissiorpoq. Thue Christiansenip ilusilersugaraa Kalaallit Nunaata erfalasua ”Erfalasorput”, siullermeerluni 21. Juni 1985 amuneqartoq.
Allattoq Najaaraq Egede
februaarip 25-at 2010 09:38

Thue Christiansen Uummannap eqqaani Marmorilimmi inunngortuusoq maanna Danmarkimi najugaqarpoq. Ilinniarfissuarmi meeqqat atuarfianni ilinniartitsisutut ilinniareerami Danmarkimi nunatsinnilu 1979 tikillugu ilinniartitsisuuvoq. Namminersornerulernerlu 1979-imi eqqunneqarmat Siumut sinnerlugu 1979-imiit 1983-imut Kultureqarnermut Naalakkeersuisuuvoq.

Thue Christiansenip ilisimaneqaatiginerpaajugunarpaa ”Erfalasorput” ilusilersoramiuk. Nunattami namminerisaminik erfalasoqalernissaa 1980-ikkunni assut oqallisaalermat, erfalasortaarnissarlu akuerineqarmat maanna erfalasorput ajugaavoq. Erfalasutta oqariartuutigaa seqernup qullariartornermini sikumut/sermimut akisugunnera. Erfalasup taassuma ajorsartippaa erfalasoq sanningasortalik qorsummik qaqortumillu qalipaatilik.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq