ThoCon eqqumaffiginiarneqarpoq

Ippassaq radioavisimi Augusta Salling piumasaqarpoq, Qeqertarsuup ernganik tunisassiornialersaartut ThoCon-ikkut uppernassusaat sukkanerpaamik misissoqqissaarneqartariaqartut. Tamanna pillugu Inuussutissarsiornermi naalakkersuisoq Sivert K. Heilmann aperaarput Augusta Salling-ip siunnersuutaa malillugu misissuilersaarsoralugit.

- Radio aviisi ippassaq tusaanngilara, kisianni Qaqortumi SIK-p nalliuttorsiorneranut atatillugu KNI-p pisortaanera Gerhardt Petersen naapippara, taassuma uannut takutippaa Danmarkimi aviisit ilaata ThoCon pillugu allaaserisaa. Nuummut uterama ingerlunga atorfilittannut takutippara tamatumalu eqqumaffigineqarnissaa taakkununnga erseqqissaassutigaara, Siverth K. Heilmann oqarpoq.

Taanna aperaarput imaannersoq taava Augusta Sallingip siunnersuutaa naapertorlugu misissuinialersaarsoralugit.

- Imatut toqqaannartumik misissuinissamik oqalunngilagut oqaannarpunga allaaserisaq taanna tunngavigalugu tamanna eqqumaffigineqartariaqartoq erseqqissaassutigiinnarpara, oqarpoq.

Aperaarput Augusta Sallingi ilumooriataassagaluarpat taava imaassimassanersoq naalakkersuisut eqqumanngippallaarsimasut.

- Taamaasinnarlugu oqaaseqarfigineqarsinnaanngilaq soorunami qinnuteqaatit assigiinngitsut misissorneqartarput. Aamma naalakkersuisuni soorunami nalileeqqittoqartariaqassaaq ukua eqqortumik allaaserinninnerit pisimassagaluarpata. Imaanngilarli akuersinivik tassa tamarmi ThoCon-imut tutsinneqartoq alloriarnerit pisarallartussaapput imermik tunisassiortoqalivinnissaata tungaanut, Inuussutissarsiornermi naalakkersuisoq Siverth K. Heilmann taama oqarpoq.