ThoCon: Augusta Sallingip apeqqusiinera eqqumiik!

Qeqertarsuarmi puilasup ernganik tunisassiulerniartut pisortaata, Guido Frank-ip, Qeqertarsuup borgmesteriata Augusta Sallingip suliffeqarfimminnik apeqqusiinera eqqumiigaa.

Borgmesteri ullualunnguit matuma siornagut oqarpoq, piginneqatigiiffiup ThoConip aallartitaat Qeqertarsuarmi maajimi tikeraartillutik ilisimatitsissutigisimagaat, imermik tunisassiulernermut atatillugu neriorsuutigisat nunaqavissut 50-it suliffissaat piviusunngorsinnaanngitsut.

- Borgmesteri taamatut oqarami kukkuvoq, Guido Frank oqarpoq. -Aallaqqaammulli pilersaarutigaarput 50-t sulilersinnissaat, aallartisarnermili ikinnerujumaarput. Tunisassiorfik tamakkiisumik imermik tunisassiulerpat neriorsuutitsitut amerlatigilerumaarput, Guido Frank oqarpoq.

Ilanngullugu ilisimatitsissutigaa Augusta Salling taamani ataatsimiinnermi oqarsimasoq, sulisussat piukkunnartut nassaariuminaassasut, taamaattumillu ilimagissagaat illoqarfimmiut amerlanerussuteqannginnissaat.

- Taamaakkaluartoq nunaqavissunik ujarlertuassaagut, Guido Frank Radioavisimut oqarpoq.

Kalaallinik piginneqatissarsiornertik suli ingerlanerarpaa, isumaqatigiissuteqarunillu tamanut nalunaarutigiumaartoq unnerlugu.