Therecia Pedersen: Meeqqakka uteqqinnavianngillat

Illoqqortoormiuni innuttaasut pingaartumik inuusuttaat aallarartuartuupput. Therecia Pedersenip 13-inik meeraqartup meerai arfineq-pingasut Danmarkimi maanna najugaqarput. Nuannarigaluarpaa ilinniariartornerat, maqaasisaqalugilli.

- Qitornagut maqaasisaraluaqaagut. Kisianni maluginiarpara inuusuttut siornatigornit ilinniarusunnerulersut, taamaammat meeqqatta amerlanersaat ilinniagaqarlutik maanna Danmarkimiipput, Therecia Pedersen oqarpoq.

Therecia uinilu ataatsimut meeraqarput siornatigullu inooqatigisimasatik aamma meeraqarfigalugit, taamaammat katillugit 13-inik meerartaqarput.

Thereciap meeqqamik Illoqqoortoormiunut uteqqinnissaat ilimagivallaanngilaa, tamannalu eqqarsaatigiinnarlugu artornarnerarpaa.

- Avinngarusimasumi najugaqarpugut, taamaammallu angalaneq akisoorujorujussuulluni. Uagut kiisami siorna angalavugut, ukiut qulit Danmarkimiinnikuunata. Meeqqavut nukarliit angalaqatigigatsigit 50.000 koruuneertariaqarsimavugut, meeqqagullu Danmarkimiittut aamma akileeqataasariaqarsimapput.

Takusarnerat akuttoqimmat artornartarpoq, oqarpoq.

Inuusuttut Danmarkimut atuariartorsimasut naammassigunik Kalaallit Nunaannut uterusuttut tusartaannarpagut.

- Kisianni uanga meeqqama maanga nuunnissaat ilimaginngilara. Takugukku aatsaat upperilissavara. Ilinniakkatimmi maani illoqarfitsinni taama mikitigisumi atorsinnaanngilaat, Therecia Pedersen oqarpoq.

Pedersenikkut meerai angerlarsimasut angajulliit marluk Danmarkimut ilinniariarlutik aallarnissartik aamma eqqartortalereerpaat, Danmarkimi ajornartorsiuleraluarunik aamma ikiorserneqapallanneqarsinnaanertik nalunagu toqqissisimanarinerussagamikku.

-Ajornartorsiuleraluarunik Danmarkimisulli maani Kalaallit Nunaanni ikiorserneqarsinnaanngillat. Taamaammat ilinniariartut uternissaat ilimaginngilara, anaanaasoq oqarpoq.