Ullaaq manna Thailandimi timmisartuutileqatigiiffiup One-Two-Go-p timmisartuutaa qeqertamut feeriartarfimmut Phuket-imut minnerliormat inuit 88-t ajunaarput inuillu 32-t napparsimavimmut unitsinneqarlutik.
Qeqertaq Phuket Thailandimi qeqertani annersaavoq, takornarianiillu soorlu Europameersunit nuannarineqarluartuulluni. Danmarkimilu angalatitsiviit arlallit Phuket-imut angalanissamut neqerooruteqartarput.
Danmarkip Bangkok-imi aallartitaqarfia nalunaarpoq, danskit konsuliat ajunaarfimmukartinneqartoq Danmarkimeersunik ilaasoqarsoralugu paasiniaajartorluni.
Maannakkuugallartorli danskit aallartitaqarfiata nutaarsiassaqartitsivimmut Ritzauimut uppernarsarsinnaanngikkallarpaa timmisartoq taanna Danmarkimeersunik ilaasoqarsimanersoq, timmisartuutileqatigiiffimmiittaaq takuneqarsinnaasimanngilaq ilaasunut allattorsimaffimmi ilaasut inuiaassutsimikkut sorlerninngaanneersuusimanerat.
Thailandilli TV-ianiit tusarliunneqarpoq, timmisartumi issimasut amerlanerpaat namminneq nunaminninngaanneersuunngitsut amerlaqisullu Europamiuusimasut.
Timmisartoq 123-nik ilaasoqarpoq tallimallu timmisartumi sulisuullutik.
Timmisartoq MD-80-iuvoq Bangkok-iminngaanneersuullunilu, oqaatigineqarpoq Phuket-imi sila ajorsimasoq, minnerliornermullu tamanna peqqutaasimagunartoq.