Thailandimiu nunatsinniittoq Burmami pisunut malinnaalluarpoq
Nunap Burmap sanileraa Thailand. Inuit allattorsimaffiat naapertorlugu Thailandimiut nunatsinni najugallit 72-upput.
Thailandimiut nunatsinni najugallit ilaat Burmami akerliussutsimik takutitsinernut malinnaalluartoq oqaloqatigaarput.
Igasut pisortaat Nuummi neriniartarfimmi Pregomi, Kiangkai Inthawong, Burmami akerliussutsimik takutitsineq aallartimmalli nittartakkakkut kiisalu CNN-ikkut malinnaalluaqqisaarpoq, malinnaaffigai Burmami demokratiimik piumasaqarlutik akerliussutitsimik aqqusinerni takutitsisut inuinnaat kiisalu mattuttut.
Klip.
- Isumaqarpunga kikkut tamarmik annilaangassutigigaat sakkutuut innuttaasunik toqoraalernissaat, kiisalu suli annilaangassutigineruaat mattuttunik toqoraasoqalernissaa.
Sakkutuut kisermaassillutik naalakkersuisut isumaqarunarput, mattuttut unitsikkunikkit aamma innuttaasut unitsinneqassasut.
Burma inunnik 47 mio.ninik inoqarpoq, 1962 –miilli sakkutuunit nuna aqunneqalerpoq. Siornatigut akerliussutitsimik takutitsisoqaraangat inuit akerliussutitsimik takutitsisut sakkutuuninngaaniit toqorarneqartarsimapput.
Kiangkai Inthawong ukiut arfineq pingasut Kalaallit Nunaanni najugaqarsimavoq, siornatigullu Burmameersunik suleqateqartarsimalluni.
- Burmami sakkutuut pissaaneqarluarput, sakkutuut inuinnarnut nerisassanik tillittarput inuinnarnullu qanorsuaq ajortuliortarlutik, taamak Kiangkai Inthawong oqarpoq. Kiangkai Inthawong-ip neriuutigaa akerliussutsimik takutitsinerat tamatumuuna inuinnarnik ajugaaffigineqassasoq. Tassa Burmami inuttaasut demokrati malillugu inuulersinnaanerat neriuutigaa.
