Thailandimi pissutsit ajornerulerput
Qitiusoqarfiup taassuma naalakkersuinermik akerliusunit aappalaartunik atisalersorsimasunit tiguarneqannginnissaa tamatumani pineqarpoq, sakkutuulli amerlaqisut aattalimmik akersuunnerit annertuseriarnissaat annlaanngatigalguu.
Thailandimi sakkutuut qoorortuulerlutik eqqarasuartaatinillu sakkoqarlutik Shilomimi aqqusineq, Bangkokip Wall Streetia tiguarpaat. Aqqusinernik qassissunnguaannarnik ungasissuseqarlutik naalakkersuisunut akerliusut - aappalaartunik tujuulullit - manna tikillugu qaammat ataasinngortorli katersuuttarput naalakkersuisut siulittaasuat Abhisid inatsisartunik atorunnaarsitsinniarlugu. Taakkua aningaasarsiornermut qitiusoqarfiup maanna sorsuffinngortinneqarneranut sakkutuunik pisuutitsipput, ujaqqanillu nunniuutinik bambussinillu katersuillutik eqqanaarsarnerlugit.
- Soorlu tassa sakkutoorpassuit aqqusineq Shilom tiguarsimagaat, aappalaartunik tujuulullit pisortaasa ilaat oqarpoq.
Thailandimi naalakkersuisunit aqquserngit akerliussutsimik takutitsisisunut matuneqartut nalunaarutigineqareerput, aappalaartunilli tujuulullit aqagu akerliussutsimik takutitsinissarsuarmik nalunaarutaat Shilomimullu siaruaattoqarnissaanut ersiutit pissutigalugit sakkutuut Bangkokimi aningaaserivik ungerutissianik ungalusimallugu.
Aappalaartunik tujuulullit, tassaanerusut Thailandimi nunap immikkoortuinit piitsoqarfinneersut aningaaserivik naalakkersuisunut, sakkutuunut sakkutuunullu pikkorinnersiukkanut qanimut attuumassuteqarnerarpaat.
Aappalaartunik tujuulullit nuannaartorisaat tusagassiuutinik piginnittoq pisoorsuaq Thaksin Shinawat 2006-imi sakkutuut naalakkersuisunik uppititsinneranni toqoraannertaqanngitsumi arlalinnik peqquserluttuliorsimanini pissutigalugu uppitinneqarpoq, taamaattumillu maanna nalakkersuisuusut inatsisinut akerliusumik ingerlatsisut, Thaksinimik tapersersuisut isumaqarput.
Akerliuniat ima sivisutigisumik akerliuniarput, allaat Bangkokimi innuttaasunit sungiutiinnarneqarlutik, soorlu arnaq una oqaluttuartoq, sakkutuutta aqqusineq maanna tiguareermassuk qanoq pisoqarnissaa annilaanganarluinnarpoq.
Tassami ajornartoorneq Thailandimi ukiuni 18-ini aatsaat taama ingasatsigisoq sap. akunnerani kingullermi inuit 24-t inuunerannik 800-nillu amerlanerusut ikiligaanerannik naleqarpoq.
