Thailandimi naalakkersuisut tunuartitaapput

Thailandimi naalakkersuisunut akerliuniarlutik suliniaqatigiit akerliussutsimik takutitsisaqattaarnerit tamaasa aqagumiit unitsinniarpaat. Akerliuniaqatigiit aallarniisuat taama nalunaaruteqarpoq, eqqartuussiviit qullersaata ministeriuneq ullumi tunuartereeraalu, partiilu naalakkersuisuutitaqartoq inerteqqutaatilereeraalu.

- Innuttaasut demokratiimik ilungersuutiginnittut isumaqatigiissutigaat, ulluni 192-ini paasisitsiniaareerlutik, akerliussutsimik takutitsisarnitik unitsinniarlugit.

Ajugaavugut anguniakkavullu anguavut, suliniaqatigiit nalunaarutaanni siuttuannit tusagassiortunut atuarneqartumi taama allassimavoq.

Thailandip ministeriunerata, ullumi siusinnerusukkut tunuarnissani neriorsuutigereerpaa, tamanna sioqqullugu eqqartuussiviit qullersaata, ukiuni tallimani naalakkersuinermik suliaqaqqusaajunnaarlugu eqqartuutereeraalu. Tamatumunnga peqatigitillugu eqqartuussiviit qullersaata, taassuma partia PPP inerteqqutaatilerpaa, partimilu nuimasut arlalissuit ukiuni tallimani naalakkersuinermik suliaqarnissaat inerteqqutigilerlugu.

Marlunngornerup siulianili akerliuniat Bangkokip mittarfissui marluusut matoqqatippaat. Ilaasussaagaluit 350.000-inik amerlassusillit Bangkokimiit timmisartukkut aallarsinnaajunnaaqqapput, taakkununnga ilaallutik takornariarpassuit nunanit allaneersut.

Timmisartunik angallannerup pissusissamisut qaqugu ingerlaqqilernissaa pisortanit aqagu ualikkut nalunaarutigineqassaaq.