Thailandimi ministeriuneq tunuarpoq

Thailandimi ministeriuneq, Somchai Wongsawat, qaammatini pingasuinnarni ministeriuneroreerluni tunuarpoq. Tamanna pivoq, nunami naalakkersuinermut tunngatillugu eqqartuussiviup ministeriuneq politikkimik ukiuni tallimani suliaqaqqunagu naalakkereeraalu. Nutaarsiassaqartitsivimmi Ritzauimi taama allaaserinnipput.
Allattoq Louise M. Kleemann
decembarip 02-at 2008 08:21

- Suliassara naammassivoq. Maanna tassaalerpunga nalinginnaasumik innuttaasoq, 61-inik ukiulik, Somchai, Thailandip avannarpasissuani illoqarfimmi Chiang Mai-imiit. Naalakkersuisunummi akerlilersuisut ministeriunerup allaffia tigusarimmassulli, illoqarfiillu pingaarnersaanni Bangkokimi timmisartoqarfiit tamaasa assermatigilli, Somchai Wongsawatip naalakkersuinini Chiang Mai-imiit ingerlattariaqarsimavaa.

Wongsawatip partiia, PPP, eqqartuussiviup aamma atorunnaarsippaa, partiimilu siulittaasut allat 36-t ukiuni tallimani politikkimik suliaqaqqunagit naalakkerlugit. Partiimmi qinersinermi kingullermi kisitsisinik eqqartuussiviup peqquserlussimanerarpai, tamannalu uppernarsaatissaqartinnerarlugu.

PPP-mi ilaasortat politikkimik suliaqarnissamik inerterneqanngitsut eqqartuussiviup aalajangererata kingunilaanngua nalunaarput nutaamik partiiliorniarlutik, inatsisartunilu decembarip ulluisa arfineq-pingajuanni taasisitsinikkut ministeriunermik nutaamik toqqaaniarlutik.

Bangkokimi timmisartoqarfissuarmiit ullaaq mannamiit kingumut angallattoqarsinnaalersoq nutaarsiassaqartitsivimmi Ritzauimiit ungasinngitsukkut allaaserineqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq