Thailandimi akerliuniarnerit tusarsaaqqilerput

Thailandimi illuatungiliuttut siuttuata Abhisitip ministeriunissatut qinigaanera tusarliunneqaannartoq, Bangkokimi akerliussutsimik takutitsinerit, nunami avissaartuuffioqisumi aallarteqqipput.

Abhisit naalakkersuisut ajornartorsiornerannik qaangiisitsisinnaasutut ilimagineqanngilaq.

Thailandip ajornartorsiutaanik qaangiiniarnissami nutaamik ministeriunertaarnissaq pingaarnerutinneqanngilaq.

Ajornartorsiutit pineqartut tassaapput illoqarfimmiut nunaannarmiullu aaqqiagiinnginnerat. Tamakkununngalu aaqqiiniarnissamut ministeriuninngorlaaq piukkunnarpallaanngilaq.

44-nik ukiullip Abhisit-ip Tuluit Nunaanni inunngorsimanini ilinniagaqarsimaninilu qimarratigisinnaanngilai. Taamaalilluni oqaatigineqarsinnaalluni innuttaasut naalakkersuinikkut siuttuuffigisassami affaanit sinneqartunit allaanerulluinnartumik tunuliaqutaqartoq.

Aamma demokratimik illersuisunit alaatsinaanneqaqqissaassaaq. Taakkumi qaammatini kingullerni Bangkokimi naalakkersuisut allaffeqarfiinik timmisartunullu mittarfissuarnik tiguaasaqattaareerput.

Akerliussutsimik takutitsisaqattaartut oqaatigaat, pisariaqassappat aqqusinerni akerliunerminnik takutitseqqissinnaallutik.

Abhisit-ip suliassaa pingaarneq siulleq tassaassaaq aningaasarsiornermut tunngasoq. Tassami Thailand allanisuulli aningaasarsiornikkut ajornartorsioqaaq.

Aningaasarsiornikkut ajornartorsiorneq piffissami kingullermi naalakkersuinikkut aaqqiagiinnginnernit sakkortusarneqarpoq, tassami tamatumuunakkut takornariaqarneq Thailandimut pingaaruteqaqisoq, eqqorneqartunut ilaammat.