Tepcomi qullersat Fukushimami ajutoortoqarneranut atatillugu pinngitsuutinneqartut
Japanimi nukissiuuteqarnermut suliffeqarfimmi Tepcomi qullersaasimasut pingasut Fukushimami 2011-mi ajutoortoqarnera pillugu pinerluuteqarsimasunik suliami unnerluutigineqartutuaat pinngitsuutinneqarput.
Nutaarsiassaqartitsivik AFP taama allaaserisaqarpoq.
Unnerluunneqarsimasut tassaapput siulersuisut siulittaasorisimasaat suliffeqarfiullu pisortaata tullersortigisimasai marluk.
Taakku ukiut arfineq-pingasut matuma siornatut Japanimi aserorteringaatsiartoqarneranik kinguneqartutut pisoqarsinnaaneranut tassa tassaarsuaqaratarsinnaaneranut tunngatillugu naammattumik paasissutissiisimanngitsutut unnerluutigineqarsimapput.
Suliffeqarfiup Tepcop Japanimi atomimik nukissiorfissuit qassiiusut ilaatigut ingerlatarai.
Qullersat pingasut inuit toqunerannik ikilertoqarneranillu kinguneqartumik ilisimasanik sumiginnaangaatsiarsimasutut ukiuni tallimani paarnaarussassanngortinneqarnissaat sinaakkutarineqaraluarpoq.
AAMMA ATUARUK Japanimi naalakkersuisut imermik qinngornernik ulorianartulinnik Manerassuarmut aniatitsiniartut
Siulersuisulli siulittaasuat pisortallu tullerisimasaat marluk mianersuaalliorsimanngitsut maanna nalilerneqarpoq.
Japanip avannaata kangisissuata sineriaa ukiut arfineq-pingasut matuma siorna nunap sajunnerata kingunerisaanik tassaarsuarmik eqqorneqarpoq.
Nunap sajunnera 9,0-mik sakkortussuseqartutut naatsorsoreneqartoq 14 meterinik portutigisunik malissuaqartitsivoq, tamannalu Fukushimami nukissiuuteqarfiup nillusaanermut atortuata qarsunneqarneranik kinguneqarluni.
Tamanna pissutigalugu nukissiuuteqarfiup reaktorii pingasut aapput.
Fukushimami atomimik nukissiorfimmi ajutoortoqarnera ukrainimiut nukissiuuteqarfiani Tjernobylimi 1986-imi ajutoortoqarnerata kingorna pisuni ajornerpaatut nalilerneqarpoq.
