Telep timersorneq aningaasaliiffigaa
Elite Sport Greenland Tele-Postimit 125.000 koruuninik ukiuni pingasuni tulliuttuni aningaasalerneqartassaaq.
- Timersortartut immikkut piginnaasallit ineriartornissamut periarfissinneqarnissaat aningaasaliinerup siunertaraa.
Tele-Post tusagassiuutinut taama nalunaaruteqarpoq.
Nunatsinni timersortartut pikkorinnerit Elite Sport Greenlandip immikkut sammisarai, timersortartullu piukkunnaatillit ukiuni makkunani aallunneqarput, siunissami aamma nunarsuarmi unammiuaarnerni nunatsinniit peqataatitsisarnerup ingerlaannarnissaa siunertaralugu aningaasaliisoqarniarluni.
- Tele-Postimiit tapersersuinermut pingaaruteqartumut peqataasinnaanerput nuannaarutigaarput, nunatsinniimmi nunarsuatsinni unammiuaarnernut peqataatitsisarnerput sulianik annertuunik aallaaveqartarpoq, taamaattumillu tapersersuiuartariaqarpugut, Tele-Postimi nioqquteqarnermut pisortaq oqarpoq.
Elite Sport Greenlandip nunatsinni timersornerup silarsuaani pitsaasumik atugassaqartitsinissaq ineriartortitsinissarlu siunertaralugit kattuffiit timersuutinut assigiinngitsunut immikkut samminnittut, pisortaqarfiit suliffeqarfiillu assigiinngitsut suleqatigai.