Tele Greenlandip Tunumi internetsip sukkatsinnissaa neriorsuutigigaa
Tasiilami nunaqarfiinilu internetsimik atuisartut ukiup matuma naannginnerani atugarissaarnerulissasut, Tele Post tusagassiuutinut nalunaaruteqarpoq.
Atuinermulli akiliutissaq sukkassuserlu suli oqaatigineqanngillat.
AAMMA ATUARUK Tele-Post sinneqartooruteqartoq: Internetimut attaveqaatinut akit apparput
Tasiilami atuisuuffik akikinnerpaa
- 75 koruuni qaammammut
- 1/0,2 Mbps (download aamma upload)
- Datataqanngilaq, datalu gigabytemut 420 koruuneqarluni.
Nuummi atuisuuffik akikinnerpaaq
- 499 koruuni qaammammut
- 5/1 Mbps
- Atuineq killeqanngitsoq, data qanorsuaq atorneqarsinnaasoq, saniatigullu akileeqqittoqartariaqarani.
Tuniniakkanimmi saqqummiussinissaminnut suli pilersaarusiorlutik, Tele Postimi sumiiffinniit sumiiffinnut attaveqaatinut pisortap, Kim Zinkip oqaatigaa.
- Oqarsinnaanngikkallarpunga qanoq sukkassuseqarsinnaanersoq, kisianni ullumikkuminngaanniit pitsaanerulertussaavoq, Kim Zink KNR-imut oqarpoq.
Ittoqqortoormiit
Taassuma Ittoqqortoormiit nunaqarfiilu mininneqassangitsut erseqqissarpaa, pilersaaruteqarpummi:
- Suliassaq annertoorujussuugami, ukiup tulliani Ittoqqortoormiini ingerlattussaassavarput, Kim Zink oqarpoq.
Pilersaarutit corona peqqutigalugu kinguaattuulaarsinnaasut taanna aamma oqarpoq.
Tele Postip attavinnik suliaqarnermini suliffeqarfissuaq Luxembourgimeersoq SES suleqatigaa.