Tele-Post sinneqartooruteqartoq: Internetimut attaveqaatinut akit apparput
Tele-Post naammaginarluinnartumik siorna manna angusaqarpoq. Tele-Post tusagassiutinut taama nalunaaruteqarpoq.
Taamaammat internetip innuttaasunut akikinnerulernernissaa ingerlatseqatigiiffiup aalajangerpaa.
Inuit amerlasuut digitalimik ineriartornermut peqataanissartik pingaartillugu namminneq aningaasartuutiminnut interneti ilannguttaraat, Tele-Postip pisortaanera Kristian Reinert Davidsen tusagassiutinut nalunaarummi allappoq.
- Kalaallit Nunaanni qaqqani meqquitsuni kangerlunnilu qinngortuuni telekkut attaveqaqatigiinnermut akisoqisumut annertuumik aningaasaliissuteqarsimavugut, innuttaasut 92 procentiisa Tusass internetimik flatratemillu interneteqarnissamut periarfissikkumallugit.
AAMMA ATUARUK Tele-Post: Immap naqqatigut kaabeli arlaliulluta akilersinnaassavarput
Atuisut ataasiakkaat internetimut pisartagaat akisunerpaartaat 1199 koruuneqarsimasoq maanna 899 koruuneqalerpoq, internetimullu attaveqaat minneq saniatigut sukkatsinneqarluni.
Ingerlatseqatigiiffiup aningaasaqarnerata qajannaannera iluaqutigalugu, coronavirusimik ajornartorsiornerup inuiaqatigiinnut sunniutai killilersimaarniarlugit, TELE-POST-i immikkuullarissumik 25 millionit koruuninik iluaqutissanik piginnittunut – Namminersorlutik Oqartussanut tapiivoq.
Imaatigut kabelimik siorna ajutoornerit ilaatigut pissutaallutik annertuumik sinneqartoornissaq Tele-Postip ilimagisimanngikkaluarpaa, ingerlatseqatigiiffilli akileraarutitsioqqullugit 120 millionit koruuninik sinneqartooruteqarpoq.