Tele-Post nerisartakkavut pillugit frimærkinik saqqummersitsisoq

Tele-Postip nangeqattaartunut frimærkiliaasa marluusut immikkoorlutik takutippaat Nunatsinni nerisassiornerup iluani mamarineqarluartut: Ammassat mattallu.

Bolatta Silis-Høegh frimærkinut marlunnut taakkununnga assilialiortuuvoq. Eqqumiitsuliortoq inuusuttoq tamatigoortorlu Nunatta frimærkiliaanut tallimassaa assilialiortuuvoq. 

- Ammassat mattallu Nunatsinni sunik nerisaqarnitsinnik eqqaasama siullersaraat. Uumasuarannguaq uumasupiluunersuarlu. Issittumi uumaannarnissamut marluullutik pingaaruteqarsimaqaat. Allakkap puussaani mattak ammassalluunniit angissusivimminik angissusilik eqqarsaatinni nuannaraara … tamussiuteriaannaaviit, Bolatta Silis-Høegh oqarpoq.

Meqqit Nunanit Avannarlerneersut tamatigut arkitut ilivitsutut aammalu miniarkitut saqqummiunneqartarput. 

Frimærkit nutaat pillugit allanik atuarit Post Greenlandip katersisartunut atugassiaani, Greenland Collector-imi, taassuma qallunaatut, tuluttut tyskisullu allassimannera PDF-inngorlugu aaneqarsinnaavoq uani: www.stamps.gl.