Tele Greenland maalaarutigineqarpoq
Skynet Nuummi aqquteqanngitsumik internettimik annertuumik nassiussuivimmik tuniniaaniartoq, immap naqqatigut kabelikkut nunarsuarmioqatigiinnut attaveqalernissamik Tele Greenlandimut qinnuteqarpoq. Qinnuteqarnerlu ingerlaqqinneq ajulermat Skynet unammilleqatigiinnermut nakkutilliisunut maalaaruteqarpoq.
Naalakkersuisut siorna septembarimi Nuummi aqquteqanngitsumik suliffeqarfiup Skynetip attavinitsitsinissaanut akuersipput. Taamaalilluni Skynetip Tele Greenlandip kisermaassilluni ingerlatsinera kipitinneqarnissaa ammaappaa. Kingornalu Skynet Tele Greenlandimut immap naqqatigut kabelikkut nunarsuarmioqatigiinnut attavininnissamut qinnuteqarpoq iluatsinneqanngitsumik. Taamaattumik Skynetimiit maalaaruteqarpugut, Skynettimi aqutsinermut pisortaq Peter Engsig-Karup oqarpoq:
- Uagutsinnut pingaartorujussuuvoq Immap naqqatigut kabelimut attaveqalernissaq, sulilu maannamut iluatsinnani. Taamaattumik unammilleqatigiinnermut nakkutilliisunut maalaaruteqarpugut, immap naqqatigut kabelikkut attaveqaqatigiinnissamut qinnuteqaatitsinnik itigartitanerput tunngavigalugu, Peter Engsig-Karup oqarpoq.
Skynet Tele Greenlandimut qinnuteqaatiminik suli akuerisaanngikkaluarluni, aqquteqanngitsumik interneteqarnerup Nuummi Nuussuarmi Qinngorpumilu atuutilissasoq pilersaarutigaa. Tassa Nuummi sumiikkaluaraanni qarasaasianiit oqarasuaatiniillu internettertoqarsinnaanngussasoq, maannakkutut angerlarsimaffimmi telefoneqarnissaq ADSL-millu taagorneqartumik attaveqarnissaq pisariaarullugu.
Kisiannili maannakkut SKYnet immap naqqatigut kabelimut attaveqannginneq suliffeqarfimmut annertuumik kinguneqarpoq, Peter Engsig-Karupip erseqqissarpaa:
- Pilersaarutivut innarlerneqarput, atuisullu Tele-p interneteqarnermut kiffartuussineranut allamik qinigassaqalernissaminnik utaqqisinneqartariaqalerlutik. Taamaattumik isumaqatigiinniarnerup iluatsinneqarnissaa uagutsinnut pingaartorujussuuvoq, Peter Engsig-Karup.
Tassa imaappoq Skynet maannakkut piviusunngoreertussaagaluarpoq, kinguartinneqarlunili.
Suliffeqarfik Nuuk tamakkerlugu antenneboksinik ikkussuileruttorpoq. Maannakkumullu nivinngaatitigassat affaat ikkussorneqareerlutik. Peter Engsig-Karupip oqaatigaa Skynet pilersaarutaasut malillugit Augustimi-septemterimiluunniit atorneqalersinnaassasoq. Kisiannili unammilleqatigiinnermut nakkutilliisut Tele Greenlandilu apeqqutaatinneqarput.
Brian Buus Pedersenip oqarnera malillugu Tele Greenland, Skynettimiit unammilleqatigiinnermut nakkutilliisunut tunniunneqarsimanerminnut ilisimasaqanngilaq, taamaattumik tamanna pillugu oqaaseqarusunnani oqarpoq.
Brian Buus Pedersenillu Skynetip Tele Greenlandimiit qinnuteqarnera itigartinneqarsimanera akerlilerpaa. Illuatungaanillu oqaatigaa Tele Greenland ukioq kingulleq novembarimi isumaqatigiissusiornissamik siunnersuummik Skynetimut tunniussereersimasoq. Brian Buus Pedersenillu oqaatigaa Skynetimiit siunnersuut naammagisimaarneqarsimanngitsoq, isumaqatigiissusiornissamillu annertunerusumik ujartuilluni. Tele Greenlandillu tamanna akuerisinnaasimanngilaa ukioq mannalu marsimi tunuliaqutaasut allakkatigut nassiullugit:
- Itigartitsisimanngilagut, illuatungaanili Skynetikkut sunniuteqarluartumik oqaluutipallassimavavut aallartisarniarneranut qanoq iliussanersut, Brian Buus Pedersen oqarpoq nangillunilu:
- Killilersuisoqarunnaassappat ajornartorsiussaagut, unammillersinnaatitaasariaqarpugummi, taamaattoqanngippammi unammillersinnaanaviannginnatta. Killilersuisoqarunnaassappammi, tamanut pitsaanerusoq anguneqassappat tamanut malittarisassaliortoqarnissaa pisariaqarpoq.
Ilulissani Sisimiunilu aqquteqanngitsumik internettimik annertuumik nassiussuivimmik tuniniaasinnaalernissani pilersaarutigaa.
