Teknikkikkut ajornartorsiuteqarluni DASH-7 kinguaattoorpoq
Air Greenlandip timmisartua DASH-7, Nuummiit ullumi ulloqeqqata siorna Kangerlussualiartoq teknikkikkut ajornartorsiuteqalernini pissutigalugu Nuummut utiinnartariaqarsimavoq. Air Greenland tusagassiuutinut taama nalunaaruteqarpoq.
Allattoq Lotte Holm
marsip 10-at 2009 11:09
Timmisartup suluusaaniittut nikisittakkat, flapsinik taaneqartartut, ikkuttoorlutik nikinneq ajulersut, timmisartup aquttuisa Nuummiit aallatsiaannarlutik malugisimavaat.
Nuup mittarfianut isumannaatsumik missinnaanissaq pillugu timmisartoq orsussamik atuiniarluni nalunaaquttap akunnerata affaata missaani qulaavaaqqaarpoq, pisorlu ajornartorsiornermik nassataqanngilaq.
Ilaasut timmisartornerup ingerlanerani ilisimatinneqarput, ilaasullu Nuummi mereernerup kingorna maleruagassat naapertorlugit katersortinneqarput, naatsumillu ilisimatitsissuteqarfigineqarlutik.
Ilaasut 32-t utiinnarnerup kingunerisaanik Danmarkiliartumut angumersinngillat, Nunattalu iluani timmisartuussinissaraluit allat aamma kinguaattoorfiullutik.
